Úkimette AÓK-ni sýbsıdııalaý jáne jeńildikti nesıe berý máseleleri qaraldy
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen Ekonomıkalyq saıasat jónindegi keńestiń kezekti otyrysy ótti, dep habarlaıdy QazAqparat primeminister.kz saıtyna silteme jasap.
Otyrys barysynda elimizdiń agroónerkásip keshenin sýbsıdııalaý jáne jeńildikti nesıe berýdiń tıimdiligi máseleleri qaraldy.
Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda Úkimetke aldaǵy úsh jyl ishinde osy maqsattarǵa jyl saıyn qosymsha keminde 100 mlrd teńge qarastyrýdy tapsyrdy.
Otyrysta Premer-Mınıstrdiń orynbasary-QR aýyl sharýashylyǵy mınıstri Ó. Shókeev baıandama jasady. Onyń aıtýynsha, birinshi kezekte, bul qarajatty salaǵa zamanaýı tehnologııalardy engizýge jáne aýyl sharýashylyǵy tehnıkalaryn jańartýdy yntalandyrýǵa, sondaı-aq mal sharýashylyǵynda tuqymdyq qaıta túrlendirýge baǵyttaý usynylǵan. Alǵa qoıylǵan mindetterdi AÓK sýbektilerin qarjylandyrýdyń qoljetimdiligin arttyrý, sonyń ishinde ınvestıtsııalyq sýbsıdııalaý kólemin ulǵaıtý, aınalymdyq jáne ınvestıtsııalyq maqsattar úshin bank nesıeleriniń qoljetimdiligin keńeıtý jáne arzandatý arqyly oryndaýǵa bolady.
Máseleni talqylaýǵa ulttyq ekonomıka mınıstri T. Súleımenov, Qarjy mınıstri Á. Smaıylov, Investıtsııalar jáne damý mınıstri J. Qasymbek jáne taǵy basqalary qatysty.
Sýbsıdııalaýdyń jyl saıynǵy kólemi (2015 jyly - 180,8 mlrd tg, 2016 jyly - 220,7 mlrd tg, 2017 jyly - 260,5 mlrd tg, 2018 jyly - 227,6 mlrd tg), orta eseppen aýyl sharýashylyǵynyń jalpy óniminiń 4-5% quraıdy. Bul DSU aıasyndaǵy uıǵaryndy deńgeı - 8,5%-dan tómen. AÓK qarjylandyrý qoljetimdiligin arttyrý maqsatynda qoldanystaǵy qarjy quraldaryn jetildirý jáne jańalaryn engizý jumystary júrgizilip jatyr. Bıyl nesıeler boıynsha negizgi qarajattarǵa, sondaı-aq, aýyl sharýashylyǵy tehnıkasynyń lızıngine syıaqy mólsherlemesin sýbsıdııalaý jańartyldy.
Alǵa qoıylǵan mindetterdi iske asyrý úshin zańnamalyq aktilerge ózgerister paketi ázirlendi. Búginde olar Parlament Májilisiniń qaraýyna jiberilgen.
Sonymen qatar, Memleket basshysynyń memlekettik qoldaý tıimdiligin arttyrýǵa qatysty tapsyrmalaryna sáıkes, tıimsiz sýbsıdııalar qysqartylady jáne aldaǵy ýaqytta tolyqtaı joıylady. Qalǵandary barynsha jeńildetiledi jáne jyl sońyna deıin tolyǵymen avtomattandyrylady. Bul - ótinimderdi qaraý merzimin orta eseppen 2,5 esege (18-den 7 kúnge deıin) azaıtyp, sybaılas-jemqorlyq qaýipterin tómendetedi. Reformalaý qorytyndysy boıynsha sýbsıdııalardyń 54 túrinen 34-i qalady.
