Úkimette áleýmettik-eńbek qatynastaryn retteý týraly kelisimge qol qoıyldy
ASTANA. QazAqparat - Búgin Úkimet úıinde Qazaqstan Respýblıkasy Premer-Mınıstri Baqytjan Saǵyntaevtyń tóraǵalyǵymen áleýmettik áriptestik pen áleýmettik jáne eńbek qatynastaryn retteý jónindegi Respýblıkalyq úshjaqty komıssııa otyrysy ótti, dep habarlaıdy primeminister.kz.
Komıssııa jumysyna QR Kásipodaqtar federatsııasynyń, Qazaqstan Eńbek konfederatsııasynyń, Taý-ken óndirý jáne taý-ken metallýrgııa kásiporyndarynyń Respýblıkalyq qaýymdastyǵynyń basshylary, sondaı-aq selektor rejıminde oblys ákimderiniń orynbasarlary qatysty.
Otyrys barysynda memlekettiń áleýmettik-eńbek saıasaty jáne «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýynda QR Prezıdenti N. Nazarbaev júktegen mindetterge sáıkes elimizdiń azamattary úshin laıyqty eńbek jaǵdaılaryn jasaý máseleleri talqylandy.
Otyrys barysynda áleýmettik-eńbek qatynastaryn retteýdiń negizgi baǵyttary boıynsha taraptardyń kelisilgen pozıtsııalaryn anyqtaıtyn Qazaqstan Respýblıkasy Úkimeti, respýblıkalyq jumyskerler birlestikteri jáne respýblıkalyq jumys berýshiler birlestikteri arasynda 2018-2020 jyldarǵa arnalǵan Bas kelisimge qol qoıyldy. Bas kelisim aıasynda qabyldanǵan mindettemelerdi iske asyrý boıynsha Іs-sharalar jospary (Jol kartasy) qaraldy jáne bekitildi.
Qujatqa áleýmettik áriptestik jáne áleýmettik-eńbek qatynastaryn retteý jónindegi Respýblıkalyq úshjaqty komıssııanyń taraptary qol qoıdy: Úkimetten - QR Premer-Mınıstriniń orynbasary E. Dosaev, jumyskerler birlestikterinen - Kásipodaqtar federatsııasynyń tóraǵasy B. Ábdiraıym jáne Qazaqstan eńbek konfederatsııasynyń bas hatshysy - M. Mashkenov, jumys berýshiler birlestikterinen - «Atameken» Ulttyq kásipkerler palatasynyń basqarma tóraǵasy A. Myrzahmetov, Jumys berýshiler konfederatsııasynyń basqarma tóraǵasy Q. Baıkenov, Taý-ken óndirý jáne taý-ken metallýrgııa kásiporyndarynyń Respýblıkalyq qaýymdastyǵynyń atqarýshy dırektory, Qazaqstan taýar óndirýshileri jáne eksporttaýshylar odaǵynyń prezıdenti N. Radostovets.
2018-2020 jyldarǵa arnalǵan Bas kelisim ekonomıkany tehnologııalyq jańǵyrtý, bıznes ortany túbegeıli jaqsartý, halyqty formaldy jáne ónimdi jumyspen qamtýǵa járdemdesý, adamı kapıtal sapasyn, eńbek jaǵdaılary men qorǵaýdy jaqsartý, sondaı-aq ónerkásiptik jáne ekologııalyq qaýipsizdik máselelerine qatysty boldy.
