Úkimette AHQO boıynsha komıssııa quryldy
ASTANA. QazAqparat - QR Úkimetinde AHQO máseleleri jónindegi komıssııa quryldy, dep habarlaıdy halyqaralyq qarjy ortalyǵynyń baspasóz qyzmeti.
QR Premer-Mınıstri Baqytjan Saǵyntaevtyń ókimimen «Astana» halyqaralyq qarjy ortalyǵynyń máseleleri jónindegi komıssııa quryldy. Komıssııa Qazaqstan Respýblıkasy Úkimetiniń janyndaǵy konsýltatıvti-keńesshi organ bolady. Komıssııanyń jumys organy QR Qarjy mınıstrligi.
Komıssııany QR Premer-Mınıstriniń birinshi orynbasary A.Mamın basqarady. Komıssııa quramyna QR Qarjy mınıstri B.Sultanov, AHQO Basqarýshysy Q.Kelimbetov jáne mınıstrlikter, Astana qalasy ákimshiliginiń, «Samuryq-Qazyna» UÁQ» AQ, «Báıterek» UBH» AQ, «Astana EKSPO-2017» UK» AQ ókilderi kiredi.
Komıssııanyń maqsaty - úzdik álemdik tájirbıeni, onyń ishinde aǵylshyn quqyǵynyń qaǵıdattary qoldanylatyn, jeńildikti salyq salynatyn jáne táýelsiz qarjylyq soty bar tájirbıeni eskere otyryp, «Astana» halyqaralyq qarjy ortalyǵynyń tabysty qyzmetin qamtamasyz etýdiń salaaralyq jáne vedomstvoaralyq máseleleri boıynsha mindetterdi iske asyrý jóninde usynystar ázirleý.
Jańadan qurylǵan komıssııanyń negizgi maqsattarynyń biri - Qazaqstan ekonomıkasyna sheteldik ınvestıtsııalardy tartýdy jáne qarjy ortalyǵy bazasynda kórsetiletin qarjylyq qyzmetterdi damytýdy yntalandyratyn normatıvtik quqyqtyq aktiler jáne ózge de qujattamalardy ázirleý.
Eske sala ketsek, AHQO-nyń mindetteri qarjylyq qyzmetter salasynda ınvestıtsııalaý úshin tartymdy orta qurý arqyly el ekonomıkasyna ınvestıtsııalar tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý bolyp tabylady. AHQO sondaı-aq elimizde saqtandyrý, bank qyzmetteri men ıslamdyq qarjylandyrý naryǵyn damytýǵa nıettenedi.
