Úkimette 2030 jylǵa deıingi janarmaı-energetıkalyq keshenniń damý tujyrymdamasy jasaqtaldy
ASTANA. QazAqparat - Úkimettiń búgingi otyrysynda 2030 jylǵa deıingi janarmaı-energetıkalyq keshenniń damý tujyrymdamasy qarastyryldy. Bul týraly búgin Ortalyq kommýnıkatsııalar qyzmetinde ótken brıfıng barysynda QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev málim etti.
"Qujat Memleket basshysynyń tapsyrmasyna sáıkes QR IJTM múddeli memlekettik organdarmen birlesip ázirlendi. Búgingi tańda jahandyq shaqyrtýlarǵa baılanysty energetıkadaǵy ınvestorlardyń oıyn erejelerin ózgertý qajettigi týyndady. Qazirgi ýaqytta elektr energetıkasy salasynda jekeshelendirý júrip jatyr. Sondyqtan salanyń damýyna qajetti qurylymdyq ózgertýler atalmysh tujyrymdamada kórsetilgen. Onda birneshe bloktar bar: elektr energetıkasy, ýran óndirisi, kómir ónerkásibi munaı-gaz sektory", - dedi ol.
Onyń sózine qaraǵanda, elektr energetıkasynyń nysandaryna ınvestorlar tartylatyn bolady. Osy oraıda ol salany tartymdy etýdiń keshendi sharalary jasalǵan. "Elektr energetıkasy salasynda tarıftik saıasattyń balansyn tabýǵa talpyndyq. Bul osy salaǵa jeke ınvestorlardy tartý úshin qajet boldy. Sonymen qatar uzaqmerzimdi tarıfter ózge salalarǵa tartylatyn ınvestıtsııalardyń kelýine de úlken sep bolady. Ol energetıkalyq salany jańǵyrtýdyń negizinde qol jetkizilmek. Tujyrymdamada naryqtyń modeli jasaldy. Energetıka salasyn ınvestorlarǵa tartymdy etip jasalady. Sondaı-aq baǵalardyń aýytqýyna da jol berilmeıdi. Osynyń arasynda tepe-teńdik quryldy", - dedi Á. Isekeshev.
