Úkimetpen birlesip jumystardy joǵary deńgeıde júzege asyrýymyz kerek - Nurlan Nyǵmatýlın
NUR-SULTAN. QazAqparat – Memleket basshysynyń áleýmettik-ekonomıkalyq, saıası reformalaryn júzege asyrý úshin Parlamentke úlken jaýapkershilik júktelip otyr. Bul týraly Májilis tóraǵasy Nurlan Nyǵmatýlın aıtty, dep habarlaıdy QazAqparat tilshisi.
«Keshe ǵana Memleket basshysy Qasym-Jomart Toqaev Qazaqstannyń aldynda turǵan negizgi maqsattar men mindetterdi belgilep berdi. Erekshe aıta ketý kerek, Prezıdenttiń tapsyrmasy boıynsha elimizde buryn bolmaǵan jańa «Qazaqstan halqyna» qoǵamdyq qory qurylatyn boldy. Ol qor tikeleı áleýmettik saladaǵy mańyzdy máselelerdi sheshýmen aınalysady. Sonymen birge, eki aıdyń ishinde halyqtyń turmysyn jaqsartý baǵdarlamasy qabyldanatyn bolady. Memleket basshysynyń áleýmettik-ekonomıkalyq, saıası reformalaryn júzege asyrý úshin Parlamentke, sonyń ishinde, Májiliske úlken jaýapkershilik júktelip otyr», - dedi N. Nyǵmatýlın Májilistiń jalpy otyrysynda.
Onyń aıtýynsha, depýtattyq korpýs barlyq bastamalardy jedel, tıisti zańdarmen qamtamasyz etý jumysyna kiristi.
«Bul jolda jeke tulǵalardyń bankrottyǵy týraly, sonymen birge, elimizdiń qaýipsizdigin qorǵaýǵa, kásipkerlikti qoldaýǵa, ásirese, aýyl sharýashylyǵyn, shaǵyn jáne orta bıznesti damytýǵa, halyqtyń tabysyn arttyrýǵa ári bilimdi kúsheıtýge erekshe nazar aýdaratyn bolamyz. Sondyqtan Úkimetpen birlesip osy jumystardy joǵary deńgeıde júzege asyrýymyz kerek», - dedi Májilis tóraǵasy.
