Úkimetpen birlesip, aýqymdy reformalardy zańnamalyq turǵydan qamtamasyz etý kerek – Májilis tóraǵasy

NUR-SULTAN. QazAqparat - Búgin Májilis Spıkeri Erlan Qoshanov «Amanat», «Aq jol», Qazaqstan halyq partııasy fraktsııalarynyń basshylarymen jáne Qazaqstan halqy Assambleıasy, «Jańa Qazaqstan» depýtattyq tobynyń jetekshilerimen keńes ótkizdi, dep habarlaıdy QazAqparat QR Parlament Májilisiniń baspasóz qyzmetine silteme jasap.

Otyrysty ashqan Erlan Qoshanov barlyq fraktsııalardyń, depýtattyq toptardyń basshylary Memleket basshysynyń Joldaýynda aıtylǵan mindetterdi oryndaý jolynda kúsh-jigerdi jumyldyryp, ony halyqqa durys jetkizý kerektigin aıtty.

Májilis tóraǵasynyń aıtýynsha, máselelerdiń kóp bóligi tikeleı zań shyǵarý qyzmetine qatysty bolǵandyqtan, Úkimetpen is-qımyl jasaýdy úılestirip, qysqa merzim ishinde aýqymdy saıası reformalardy zańnamalyq turǵydan qamtamasyz etý qajet.

Sonymen qatar, Palata Spıkeri Parlamenttiń fýnktsııalary men ókilettikteri aıtarlyqtaı qaıta qaralǵanyn atap ótip, depýtattyq korpýsty qalyptastyrý, Parlament palatalarynyń ózara is-qımyl jasaý tártibi ózgertiletinine nazar aýdardy.

Osy jolda Májilistiń bıýdjet qarajatynyń jumsalýyn baqylaý salasyndaǵy róli kúsheıtilmek. Jalpy alǵanda, Ata zańnyń 30-dan astam babyna, 7 Konstıtýtsııalyq jáne 15-ten astam zańǵa ózgerister engizý kózdelip otyr.

- Elimiz jahandyq ózgeris aldynda tur. Sondyqtan osyndaı jaýapty sátte biz Memleket basshysy alǵa qoıǵan mindetterge barynsha kóńil bólip, ony keshendi túrde iske asyrýǵa kirisýimiz kerek, - dedi Erlan Qoshanov.