Úkimetke jergilikti ákimdikterden kelgen jańa qyzmetkerler óńirlerdiń deńgeıin joǵarylatýǵa yqpal etedi - N. Nazarbaev
ASTANA. 27 qańtar. QazAqparat /Rýslan Ǵabbasov/ - Úkimetke jergilikti ákimdikterden kelgen jańa qyzmetkerler óńirlerdiń deńgeıin joǵarylatýǵa yqpal etedi.
Bul týraly búgin keńeıtilgen Úkimet otyrysynda Elbasy Nursultan Nazarbaev málim etti.
«Búgin men halyqqa Joldaýymdy jarııaladym. Parlamenttiń saılaýy ótti. «Nur Otan» partııasyna daýys berip halyq bizdiń baǵdalamalar men atqarǵan sharýany qoldap shyqty. Endi ary qaraı jumys isteý kerek»,-dedi Memleket basshysy.
«Biz aldaǵy álemdik qarjy daǵdarysynyń ekinshi tolqyny jaıynda aıtqan bolatynbyz. Ony eńserýge daıyn bolýymyz shart. Úkimet bul máselelerdi josparly sheshýi tıis. Osyǵan deıingi daǵdarysty ońtaıly eńsergen bolsaq, endi aldaǵy daǵarysqa da ýaqytyly daıyndalamyz dep úmittenemin»,-dedi N. Nazarbaev.
Memleket basshysy osy saılaýdan keıin Úkimet jańadan taǵaıyndalǵanyn, birqatar mınıstrler men ákimder aýysqanyn jetkizdi. «Jergilikti ákimdikterdiń keıbir basshylary Úkimetke qyzmetke keldi. Olar jergilikti aımaqtarda jınaqtaǵan tájirıbeleri men bilimderin alyp keldi dep sanaýǵa bolady. Jalpy jergilikti jaǵdaıdy biletin adamdar jumysqa keldi. Sonymen, Úkimettiń jumys isteýine, ákimdikterdiń jumysynyń deńgeıin joǵarylatýǵa yqpal jasaıdy dep oılaımyn»,-dep toqtaldy Prezıdent.
Bul turǵyda N. Nazarbaev, jańadan taǵaıyndalǵan Úkimet músheleri men ákimderge quttyqtaýyn jetkizdi.
«Jumystaryń jemisti bolsyn jáne júktelip otyrǵan senimdi oryndaý kerek»,-dep túıindedi Elbasy.
Esterińizge sala keteıik, jańa taǵaıyndaýlar aıasynda Úkimet quramyna Qaraǵandy oblysynyń burynǵy ákimi Serik Ahmetov Premer-Mınıstrdiń birinshi orynbasary bolyp, al Pavlodar oblysynyń ákimi Baqytjan Saǵyntaev Ekonomıkalyq damý jáne saýda mınıstri bolyp bekitildi.
