Úkimetke jańa strategııalyq jospar qurý mindeti júkteledi - Prezıdent
ASTANA. QazAqparat - Búgin ulttyq telearnalar arqyly jyl saıynǵy Qazaqstan xalqyna arnalǵan Joldaýyna qatysty málimdeme jasaǵan Memleket basshysy Nursultan Nazarbaev Úkimetke arnaıy strategııany ázirleýdi tapsyrdy, dep xabarlaıdy QazAqparat tilshisi.
Prezıdenttiń aıtýynsha, bıylǵy Joldaýda bıznes, aýyl sharýashylyǵy, kólik pen logıstıka, turǵyn úı máselesi de nazardan tys qalmady. Bilim berý, densaýlyq saqtaý men xalyqty áleýmettik qorǵaý salasyn damytý sharalary da kórsetilgen.
«Úkimetke eldi jańǵyrtýdyń úshinshi kezeńi boıynsha «Qazaqstannyń ulttyq-texnologııalyq bastamasy - qazirgi zamannyń qaýip-qaterlerine tótep berý joly» atty 2025 jylǵa deıingi strategııalyq jospardy ázirleý mindeti júkteledi. Osyǵan baılanysty Úkimet múshelerine jaqsylap jumys isteýge týra keledi. Mindetter naqty ári aıqyn, mańyzy da zor. Ol úshin mamandar bar, ınfraqurylym bar, tıisti memlekettik organdar bar. Quzyretti mınıstrlikter óz deńgeıinde barlyq sharalardyń atqarylýyn qamtamasyz etýi kerek. Osynyń bári ekonomıkanyń ósýin uzartady. Jaqynda elimizdiń saıası jańǵyrýynyń jobasy jarııalanǵan bolatyn. Osy bastamalar birin-biri tolyqtyryp, Qazaqstannyń uzaqmerzimdi damýyn kózdeıdi. Osylaısha biz «Strategııa - 2050»-diń basty maqsaty - Qazaqstannyń damyǵan 30 memlekettiń qataryna enýine jete alamyz», - dedi Nursultan Nazarbaev.
Óz sózinde Memleket basshysy xalyqtyń atalǵan bastamalardy qoldaıtynyna senim bildirdi.
