Úkimetke tıisti saýaldar qoıamyz – Máýlen Áshimbaev Ekibastuzdaǵy apat týraly

ASTANA. QazAqparat – Parlament Senatynyń tóraǵasy Máýlen Áshimbaev Ekibastuz jylý-elektr ortalyǵyndaǵy apatqa pikir bildirdi, dep habarlaıdy QazAqparat tilshisi.

«Ekibastuzdaǵy jaǵdaı bárimizdi alańdatyp otyr. Mundaı jaǵdaı bolmaýy kerek edi. Tıisti qorytyndylary shyǵarylyp jatyr, kináliler jaýapqa tartylady. Tıisti tapsyrmalardyń bárin Prezıdentimiz berdi. Tez arada osy jaǵdaıdy jóndeý úshin barlyq kerekti sharalar júrgizilýde. Muny qazirgi ýaqyttaǵy eń basty másele desek, artyq bolmaıdy. Sondyqtan osyndaı qıyn jaǵdaıǵa tap bolǵan adamdarǵa kómektesý úshin barlyq kerekti sheshimderdi jasaýymyz kerek», - dedi M. Áshimbaev Senat kýlýarynda tilshilerge bergen suhbatynda.

Senat tóraǵasy strategııalyq nysandardy memleketke qaıtarý máselesine de jeke toqtaldy.

«Bul da mańyzdy máseleniń biri jáne barlyǵy zań aıasynda júrgizilýi kerek. Osy jaǵdaıdan keıin kim jaýapty boldy, qalaı boldy, nege daıyndyq jumystary jasalmaǵan degen suraqtardyń barlyǵyna tıisti organdar jaýap beredi. Sodan keıin osy nysandardy memleketke qaıtarý máselesi qaralady. Sondyqtan bul jerde naqty osy obektige qatysty bir nárse aıtýǵa áli erte. Jaǵdaı durystalsyn, halyqqa jylý bereıik, áleýmettik másellerdi shesheıik, sodan keıin osy nysandy Memleketke qaıtarý qarastyrylady», - dedi spıker.

Máýlen Áshimbaev «qala, oblys ákimderi otstavkaǵa ketýi kerek pe?» degen suraqqa jaýap berdi.

«Bul jerde keshendi jaýapkershilik bolýy kerek shyǵar. Qazir apatqa jaýapty adamdardy anyqtaý kerek. Qala, oblys ákimdikteri bar, ınvestorlar bar, kompanııa qojaıyndary bar, tekserýshi organdar nege ýaqytynda qaramady degen suraq týyndaıdy. Sondyqtan keshendi sheshim qabyldaý kerek shyǵar, bir adamdy kináli etip kórsetý jaǵdaıdy tolyq kórsetpeıdi», - deıdi M. Áshimbaev.

Sonymen birge, Senat osy másele boıynsha Úkimetke tıisti saýaldaryn joldaıdy.

«Biz Parlament tarapynan da osy máselelerdi kóteremiz. Qazir biz jaǵdaıdyń rettelip, jylý elektr stantsııasynyń iske qosylýyn jáne Ekibastuz turǵyndarynyń jylý alýyn kútemiz. Óz tarapymyzdan da Úkimettiń aldyna tıisti suraqtardy qoıamyz, Úkimet qazir de elimizdiń basqa óńirlerinde mundaı TJ bolmaý úshin sharalar qabyldap jatyr», - dep túıindedi M. Áshimbaev.

Aıta keteıik, búgin Ekibastuzda 25 kóppáterli, 90 jer úı jylýsyz otyr.