Úkimetke mektepte 12 jyldyq oqýdyń oılastyrylǵan modelin ázirleý tapsyryldy
NUR-SULTAN. QazAqparat – Prezıdent Qasym-Jomart Toqaev Úkimetke mektepte 12 jyldyq oqýdyń oılastyrylǵan modelin ázirleýdi tapsyrdy, dep habarlaıdy QazAqparat tilshisi.
«Búgingi tańda álemde orta bilim berýdiń 12 synypqa eseptelgen standarty qalyptasyp qalǵan. Sondaı-aq, bastaýysh mektepte oqý protsesin uzartý úrdisi de saqtalyp otyr. Álem elderiniń 60-qa jýyǵynda mekteptegi oqý alty jastan bastalady. Bul qadam balany erterek ıntellektýaldyq damýǵa, áleýmetke beıimdelýine yqpal etedi. Úkimetke osy rette jańa 12 jyldyq modelge oılastyrylǵan ári ornyqty aýysymdy qamtamasyz etýdi tapsyramyn. Bul jerde 2025 jylǵa deıingi bilim men ǵylymdy damytýdyń jańa memlekettik baǵdarlamasyn iske asyrý aıasynda «oılastyrylǵan ári ornyqty» aýysym degen sózdi erekshe atap otyrmyn», - dedi Prezıdent Tamyz konferentsııasynda.
Eske sala ketsek, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Tamyz konferentsııasy ótip jatyr.
