Úkimetke eldegi joǵary oqý oryndaryn ınnovatsııalyq qyzmetke aýystyrýdyń tetikterin oılastyrý qajet - Prezıdent
ASTANA. 28 qańtar. QazAqparat /Aıdar Ospanalıev/ - Memleket basshysy Úkimetke eldegi joǵary oqý oryndaryn ınnovatsııalyq qyzmetke aýystyrýdyń tetikterin oılastyrýdy tapsyrdy. Elbasy bul týraly búgin Parlament palatalarynyń birlesken otyrysynda halyqqa Joldaýynda málim etti.
«Men Úkimetke jańa bilim berý salasyn qoldaý men onyń sapasyn arttyrý maqsatynda qarjy-ekonomıkalyq quraldardy engizip, tehnıkalyq jáne joǵary deńgeıdegi bilim berýdiń qoljetimdiligin keńeıtip, jınaqtaý júıesin qalyptastyrýdy tapsyramyn. Jınaqtaý júıesin bizdiń qazirgi tańdaǵy ıpotekalyq qurylys boıynsha «Turǵynúıqurylysjınaqbankindegi» júıe boıynsha qalyptastyrǵan jón. Bizdiń azamattarymyzǵa balalarynyń bilim alýlary úshin memleketten paıyzdyq bonýstar alý arqyly qarjy jınaý múmkindigi jasalýy tıis», - dedi Prezıdent.
Elbasy sonymen qatar sózinde ýnıversıtettik bilim berý men ǵylym damýynyń jańa deńgeıin qamtamasyz etý qajettigin eskertti. «Nazarbaev ýnıversıteti bazasynyń negizinde naryq talaptaryna beıimdelgen joǵary oqý oryndarynyń jańa úlgisi qalyptasady. Ol ózge qazaqstandyq joǵary oqý oryndaryna úlgi bolady», - dep atap ótken Memleket basshysy elimizdegi ǵylymı ataqtardy berý júıesin synǵa aldy.
«Eki júzden astam ǵylymı keńester kandıdattardy top-tobymen shyǵarýda. Al ǵylym doktorlary bizdiń aramyzda da jetkilikti. Shyn máninde ǵylym salasyna 60 kandıdat pen 37 doktordyń bireýi ǵana qyzmet etedi. Bul kimge jáne ne úshin qajet?. Bıylǵy jyldan bastap bul ǵylymı keńesterdiń qyzmeti toqtatylady. Endi PhD magıstrleri men doktorlary daıyndalady», - dedi Memleket basshysy.
