Úkimetke balyq sharýashylyǵyn damytýdyń 2030 jylǵa deıingi baǵdarlamasy tanystyryldy

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev Úkimetke balyq sharýashylyǵyn damytýdyń 2030 jylǵa deıingi baǵdarlamasyn tanystyrdy, dep habarlaıdy QazAqparat tilshisi.

«Elimizdiń balyq ónimderi naryǵynyń 2019 jylǵy jalpy kóleminiń qurylymy kelesideı: balyq aýlaý – 45 myń tonna, balyq ósirý – 7,4 myń, eksport – 30 myń, al ımport – 45 myń tonna boldy. Balyq ósirý balyq sharýashylyǵyn damytýdyń qarqyndy ósimine aınalýǵa tıis», - dedi Maǵzum Myrzaǵalıev Úkimet otyrysynda.

Mınıstrdiń aıtýynsha osyǵan oraı, mınıstrlik ǵalymdarmen jáne sarapshylarymen birlesip, balyq sharýashylyǵy salasynyń damytý potentsıalyna taldaý júrgizgen. Sonyń nátıjesinde respýblıkanyń sý aıdyndarynda jylyna 600 myń tonnaǵa deıin balyq ósirýge bolatyny anyqtalǵan.

«Buny biz kezeń-kezeńmen iske asyrýdy josparlap otyrmyz. Boljam boıynsha áleýettiń 45%-na 2030 jyly, al 55%-na 2040 jylǵa deıin qol jetkiziledi. Mınıstrlik oblys ákimderimen birlesip balyq sharýashylyǵyn damytýdyń óńirlik baǵdarlamalaryn ázirledi. Olardyń negizinde balyq sharýashylyǵyn damytýdyń 2030 jylǵa deıingi salalyq baǵdarlamasy jasaldy. Baǵdarlamaǵa sáıkes 2030 jylǵa qaraı jylyna shamamen 270 myń tonna taýarly balyq ósirý josparlanyp otyr. Josparǵa sáıkes, 545 jańa balyq ósirý sharýashylyǵy qurylyp, jumys istep turǵan 323 sharýashylyq tolyq jobalyq qýatyna shyǵady», - dedi ol.