Úkimet jylý berý maýsymynyń qorytyndysyn saralaıdy
ASTANA. 29 sáýir. QazAqparat - Úkimette osy aptada birqatar mańyzdy sharalar josparlanǵan. Bul týraly búgin Ortalyq kommýnıkatsııalar qyzmetiniń resmı ókili Altaı Ábıbýllaev aptalyq brıfıngte málim etti.
«Erteń, 30 sáýirde Qazaqstan Úkimetiniń dástúrli otyrysynda elimizdiń ındýstrııalyq-ınnovatsııalyq damýynyń qorytyndylary men qazirgi ahýaly qarastyrylmaq. Sonymen qatar, jylý berý maýsymy qorytyndylanady», - dep atap ótti resmı ókil.
Onyń aıtýynsha, otyrysta ındýstrııalyq-ınnovatsııalyq damý baǵdarlamasynyń iske asyrylý barysy jaıynda QR Premer-Mınıstriniń orynbasary-Indýstrııa jáne jańa tehnologııalar mınıstri Áset Isekeshev, «Samuryq-Qazyna» ulttyq ál-aýqat qory» AQ basqarma tóraǵasynyń orynbasary Qýandyq Bıshimbaev pen «Atameken» Odaǵy» Ulttyq ekonomıkalyq palatasynyń basqarma tóraǵasy Abylaı Myrzahmetov baıandama jasaıdy.
Aıta ketý kerek, Á.Isekeshev ındýstrııalyq-ınnovatsııalyq damý baǵdarlamasynyń iske asyrylýy jaıynda sol kúni, ıaǵnı 30 sáýirde Ortalyq kommýnıkatsııalar qyzmetinde jýrnalıster qaýymyna arnap baspasóz máslıhatyn ótkizedi.
Sondaı-aq, 2 mamyrda QR Premer-Mınıstriniń birinshi orynbasary-Óńirlik damý mınıstri Baqytjan Saǵyntaev jumys saparymen Mańǵystaý oblysyna barady. Al 30 sáýirde Úkimet basshysynyń orynbasary Erbol Orynbaev pen Densaýlyq saqtaý mınıstri Salıdat Qaıyrbekova Respýblıkalyq neırohırýrgııa ǵylymı ortalyǵynyń Birikken halyqaralyq komıssııasynda akkredıtatsııalaý rásimine qatysady.
