Úkimet jumys tásilderin ózgertýi kerek – Lázzat Ramazanova

NUR-SULTAN. QazAqparat - Qazaqstan Úkimeti Prezıdent Qasym-Jomart Toqaevtyń tapsyrmalaryn tıimdi iske asyrý úshin jumys tásilderin qaıta qaraýy kerek. QR Parlamenti Májilisiniń depýtaty, QR Prezıdenti janyndaǵy áıelder isteri jáne otbasylyq - demografııalyq saıasat jónindegi ulttyq komıssııanyń tóraıymy Lázzat Ramazanova osyndaı pikir bildirdi.

«Eldi túbegeıli reformalar kútip tur. Aldaǵy aılar, mınıstrler men barlyq deńgeıdegi sheneýnikterden bastap búkil parlamenttik partııalardyń depýtattaryna deıingi barlyq memlekettik apparattyń beriktigin synaý mezgili bolady dep sanaımyn», – dedi Lázzat Ramazanova Facebook paraqshasynda.

Sonymen qatar, ol Memleket basshysynyń ótken Májilis otyrysynda alǵa qoıǵan mindetteriniń mańyzyn atap ótti.

«Birinshi kezekte, bul halyq tabysynyń ósýin qamtamasyz etý, baǵany turaqtandyrý jáne ınflıatsııany tómendetý. Bul ózgeristerdi árbir turǵyn tek esepterde ǵana emes, is júzinde óz qaltasynda seziný qajet. Arnaıy qyzmetterde, ІІM men kúshtik qurylymdarda qysqa merzimde sapaly reformalar júrgizý asa mańyzdy. El turǵyndary ózderin qaýipsiz sezinýi tıis», - dep atap ótti ulttyq komıssııa basshysy.

Lázzat Ramazanova bilim sapasyn arttyrýǵa, az qamtylǵan otbasynan shyqqan balalar úshin granttardy ulǵaıtýǵa jáne eńbek naryǵyna sáıkes kadrlar daıarlaýǵa baılanysty máseleler blogyn mańyzdy dep sanaıdy.

Ol, sondaı-aq, áıelder isteri jónindegi ulttyq komıssııa Prezıdenttiń Jarlyǵymen bekitilgen otbasylyq jáne genderlik saıasat tujyrymdamasyn iske asyrýdy jalǵastyrýǵa nıetti ekenin aıtty.

«Bılik halyqtyń sózin estı alatynyn kórsetti. Endi áreket etý kerek. Sózden iske aýyspaıtyn bolsaq, bul eshqashan aqtalmaıdy da keshirilmeıdi de», - dedi Lázzat Ramazanova.