Úkimet Jezqazǵan, Sátbaev qalalaryn jáne Ulytaý aýdanyn damytýdyń keshendi josparyn qabyldady
ASTANA. 27 jeltoqsan. QazAqparat - Búgin Úkimettiń qorytyndy otyrysynda Qaraǵandy oblysynyń Jezqazǵan, Sátbaev qalalary men Ulytaý aýdanyn áleýmettik-ekonomıkalyq damytýdyń keshendi jospary qabyldandy.
Atalǵan jospardy tanystyrǵan QR Óńirlik damý mınıstri Bolat Jámishevtiń atap ótýinshe, sońǵy ýaqytta «Qazaqmys» JShS-nyń Jezqazǵan ken oryndarynda ken óndirý kólemi 28 mln. tonnadan 19 mln. tonnaǵa deıin kemigen. Buǵan qosa ken quramyndaǵy mystyń kólemi 2 esege deıin azaıǵan. Bul mys óndirisiniń quldyraýyna ákep otyr. Sondyqtan Úkimet qabyldaǵan keshendi josparda «Qazaqmys» kásipornynda jańa tehnologııalardy engizýmen baılanysty túıtkildi máselelerdi sheshý kózdelgen.
«Qabyldanǵan barlyq sharalardyń nátıjesinde 2020 jylǵa qaraı salyq túsimderi qosymsha 323 mlrd. teńgeni quraıdy, óńirdegi ónerkásip ónimi 32 paıyzǵa artady. Shaǵyn jáne orta bıznes te óndiris kólemin qosymsha 9 paıyzǵa arttyrady. Atalǵan kásiporynnyń 22 myń qyzmetkeriniń ortasha jalaqysy 14 paıyzǵa ósedi», - dedi ol.
