Úkimet jetim balalardy qamqorlyqqa alǵandarǵa járdemaqy tóleý máselesin oń sheshýi tıis - D. Nóketaeva
ASTANA. Jeltoqsannyń 9-y. QazAqparat /Qanat Mámetqazyuly/ -Úkimet jetim balalardy qamqorlyqqa alǵandarǵa járdemaqy tóleý máselesin oń sheshýi tıis. Búgin QR Parlamenti Májilisiniń jalpy otyrysynda Áleýmettik-mádenı damý komıtetiniń tóraıymy Dınar Nóketaeva osylaı málim etti,
dep habarlaıdy QazAqparat.
«Neke, erli-zaıyptylyq jáne otbasy týraly» kodeks jobasy Májiliste birinshi oqylymda maquldandy. Qazir joba ekinshi oqylymǵa ázirlený ústinde. Osy mańyzdy qujatty qabyldaýdyń nátıjesinde otbasylyqty nyǵaıtý, balalar quqyǵyn qorǵaý salasynda júrgiziletin jumystar eleýli túrde jaqsaratyny kútiledi. Elimizde jetim balalar men ata-ana qamqorlyǵynsyz qalǵandardy qorǵaý baǵytynda kóptegen sharalar atqarylyp jatyr. Birqatar aımaqtarda otbasy úlgisindegi balalar jáne jasóspirimder úıleri bar. Bala asyrap alǵan, balalarǵa patronattyq tárbıe beretin otbasylarǵa járdemaqy tólenedi. Alaıda, eń ózekti ári kópten beri kúrmeýi sheshilmeı kele jatqan másele - bul ata-analarynyń qamqorynsyz qalǵan balalardy kútip-baqqany úshin qorǵanshylar men qamqorshylarǵa járdemaqy tóleý bolyp tabylady. Bul rette depýtattar kodeks jobasyna bala asyrap alýdy yntalandyrý maqsatynda qorǵanshylar men qamqorshylarǵa ata-ananyń qamqorynsyz qalǵan jetim balalardy kútip-baǵýǵa járdemaqy taǵaıyndap, tóleýde zańnamalyq turǵydan qamtamasyz etetin birqatar usynystar engizgen edi. Ókinishke qaraı, bul usynystar Úkimet tarapynan qoldaý tappaı otyr», dedi komıtet tóraıymy.
Onyń aıtýynsha, resmı derekter boıynsha elimizdegi 46 myń 126 jetimder men ata-analardyń qamqorlyǵynsyz qalǵan balalardyń 28 myń 113-i qorǵanshylyqqa-qamqorshylyqqa berilgen. Depýtattyń sózine qaraǵanda, qorǵanshylyq-qamqorshylyq ınstıtýty balalardyń otbasynan ajyramaı, tabıǵı ortada tárbıelenýine, olardyń durys ósip-jetilýine jaǵdaı jasaıdy. Sondyqtan qorǵanshylyq-qamqorshylyq ınstıtýtyn damytý elimizdegi birden-bir mańyzy zor áleýmettik másele bolyp tabylady. «Qazaqstanda qorǵanshylyq-qamqorshylyq jasaıtyndardyń basym bóligi egde tartqan adamdar. Olardyń 90 paıyzǵa jýyǵy tabysy tómen zeınetkerler. Osy aıtylǵandardy eskere kele, Úkimetten ata-ananyń qamqorlyǵynsyz qalǵan balalardy asyrap alǵandarǵa eń tómengi kúnkóris deńgeıi mólsherinde járdemaqy taǵaıyndaý múmkindigin qarastyrýdy suraımyz. Eseptep baıqasaq, bul maqsatqa jylyna 4,5 mlrd. teńge qarajat jumsalady eken. Ekonomıkasy órkendeý ústindegi memleketimizge bul asa aýyr salmaq emes», dedi D. Nóketaeva.
