Úkimet jeke turǵyn úı qurylysyna qoldaýdy arttyryp, arnaıy zań qabyldaýy kerek - Q. Aıtahanov
Senatordyń aıtýynsha, elimizde baspana máselesin sheshýdiń eń tıimdi joly - bul jeke menshik turǵyn úı qurylysy. Alaıda, Jer kodeksindegi azamattarǵa turǵyn úı qurylysy úshin jer ýchaskesin alýǵa quqyq beretin norma oryndalmaı otyr. Buǵan sebep ınfraqurylym tartylmaı jer ýchaskeleri berilmeıdi degen zań normasy. «Osyǵan baılanysty búgingi tańda jeke úı salý úshin jer telimin alý kezeginde qazir 1,4 mln adam kezekte turǵan sııaqty. Ol kezekti árıne tekserý kerek. Biraq sońǵy on jylda olardyń sany 14 esege ósipti. Bul turǵyndar arasynda narazylyq týdyrýda. Óıtkeni, Jer reformasy jónindegi komıssııaǵa kelip túsken suraqtardyń 80 paıyzdan astamy osy on sotyq jerge qatysty bolyp otyr», - dedi depýtat. Onyń aıtýynsha, búgingi kúni memlekettiń barlyq azamattarǵa úı salyp berýge múmkindigi joq. Sol sebepti jeke azamattardyń qarjysyn, áleýetin paıdalanyp, jeke turǵyn úı salýǵa barynsha qoldaý kórsetilýi kerek. Sonda halyq óz qarjysy esebinen úı salyp alýǵa beıim.
«Úkimet jeke turǵyn úı salýdy jedeldetý úshin jer telimderin berý máselesin sheship, jeke turǵyn úı salýshylarǵa qoldaý kórsetý kerek. Bul rette uzaq merzimge ári arzanǵa nesıe berý, ınfraqurylym jáne qurylys materıaldaryn qamtamasyz etý sharalary sheshilip, rettelse ıgi. Osynyń bárin retimen júzege asyrý úshin arnaıy «Jeke menshik turǵyn úı qurylysy týraly» zań qabyldanýy kerek», - dedi senator Qýanysh Aıtahanov.
