Úkimet jastar úshin basty másele - baspana máselesin sheshýi kerek - Q. Aıtahanov
ASTANA. QazAqparat - Úkimet jastar úshin basty másele - baspana máselesin sheshýi kerek. Búgin Parlament Senatynyń jalpy otyrysynda «Qazaqstan Respýblıkasynyń memlekettik jastar saıasaty týraly» zańyn talqylaý barysynda senator Qýanysh Aıtahanov osylaı málimdedi.
«Jastardyń baspana máselesin sheshý elimizdegi demografııalyq ahýalǵa tikeleı yqpal etedi. Sondyqtan da, Úkimet jastardyń bul máselesin sheshý joldarynyń tıimdi tetigin naryq jaǵdaıymen úılestire otyryp sheshý kerek. Jas otbasylar úshin turǵyn úı júıesin damytý zań jobasynyń negizgi baǵytyna engen, alaıda ony kim aıqyndaıtyny, kim sheshetini naqty kórsetilmegen. Zań jobasynyń negizgi baǵyty osy bolǵandyqtan buny naqtylap engizý kerek edi», - dedi Qýanysh Aıtahanov. Bul rette senator jastardy turǵyn úı salýmen qamtý úshin jer telimderin jeńildikpen berý sekildi máseleler de qamtylýy tıistigin atap ótti.
Al senator Ahan Bıjanov Úkimette jastar men halyqtyń az qamtylǵan jigin baspanamen qamtamasyz etýge baǵyttalǵan baǵdarlama ázirlenip jatqanyn atap ótti. «Prezıdent tapsyrmasyna sáıkes, 6 mln. sharshy metrden astam turǵyn úı jyl saıyn beriletin bolady, al sonyń ishinde 1 mln. sharshy metri jastar saıasatyn júzege asyrý aıasynda beriletin bolady. Osy turǵydan alǵanda belgili bir qadamdar atqarylyp jatyr», - dedi A. Bıjanov.
