Úkimet janynan Memlekettik shekara komıssııasy qurylatyn boldy
ASTANA. 21 qarasha. QazAqparat - QR Úkimeti janynan Memlekettik shekara komıssııasy qurylatyn bolady.
Bul týraly búgin Parlament Májilisiniń jalpy otyrysynda «Qazaqstan Respýblıkasynyń Memlekettik shekarasy týraly» zań jobasy boıynsha baıandaǵan QR Ulttyq qaýipsizdik komıteti Shekara qyzmeti dırektorynyń mindetin ýaqytsha atqarýshy Turǵanbek Stambekov málim etti.
UQK ókiliniń aıtýynsha, Úkimet janynan qurylatyn komıssııa konsýltatıvtik-keńesshi organ bolyp tabylady. Komıssııa qorǵanys salasy boıynsha memlekettik jáne jergilikti atqarýshy organdardyń ózara is-qımylynyń maqsattylyǵyn aıqyndap otyrady.
«Komıssııa quramyna múddeli mınıstrlik ókilderi, ýákiletti organ basshylary, shekara mańy oblys ákimderiniń birinshi orynbasarlary kiretin bolady. Komıssııanyń jumysshy organy retinde QR Premer-Mınıstri Keńsesiniń qorǵanys jáne tártip bólimi aıqyndalady»,-dedi T. Stambekov.
Onyń sózine qaraǵanda, komıssııanyń negizgi mindeti - Qazaqstanǵa tónýi múmkin qaterlerdi aıqyndaý, olardy joıý boıynsha keshendi sharalar qabyldaý. Budan bólek komıssııa shekara salasy boıynsha Qazaqstannyń ulttyq múdddelerin aıqyndap, osy baǵyttaǵy saıasatty jetildirý úshin usynymdar ázirleıdi.
