Úkimet zań jobalarynyń sapaly daıyndalýyna nazar aýdarsa ıgi - Q. Toqaev
ASTANA. QazAqparat - Búgin Parlament Senatynyń aǵymdaǵy sessııa boıynsha sońǵy jalpy otyrysy ótti. Osyǵan oraı, palata jumysyn qorytyndylaǵan Senat spıkeri Qasym-Jomart Toqaev birqatar máselelerge nazar aýdartty.
«Biz osymen palatanyń tórtinshi sessııasyndaǵy jumysyn aıaqtadyq. Osy parlamenttik maýsym ishinde qoǵamdyq-saıası mańyzdy sheshimderdiń kýási boldyq. Elimizde jalpyhalyqtyq bastamadan bastaý alǵan prezıdenttik saılaý ótti. Otandastarymyz Memleket basshysy Nursultan Nazarbaevpen tyǵyz baılanystyratyn tarıhı tańdaýyn jasady»,-dedi spıker Q. Toqaev.
Budan bólek, Palata Tóraǵasy álemdik ekonomıkada oryn alǵan jaǵymsyz qubylystar men halyqaralyq deńgeıdegi qaıshylyqtar ózekti bola túskenin, ýaqyttyń syn-qaterlerine daıyn bolý úshin zaman talabyna saı jedel áreket etip, sheshimder qabyldaýǵa árdaıym ázir bolýdyń mańyzdylyǵy arta túskenin alǵa tartty.
«Osy syn-qaterlerdiń teris saldaryna syndarly jaýap retinde Elbasy Qazaqstannyń oń damýyn qamtamasyz etýge baǵyttalǵan «Nurly jol» atty ekonomıkalyq saıasatyn jarııalady. Memleket basshysy Parlamenttiń tórtinshi sessııasynyń ashylýynda «Qazaqstan-2050» strategııasyn júzege asyrýdaǵy mańyzdy sharalarǵa toqtalǵan bolatyn. Osy maqsattardy oryndaý barysynda Parlament 113 zań qabyldady. Atap aıtqanda, Memleket basshysynyń tapsyrmasyna sáıkes, qoldanystaǵy zańnamalar memlekettik basqarý júıesin odan ári jetildirildi, jer qoınaýyn paıdalanýdy jeńildetý, derbes bilim berý uıymdarynyń qyzmetin retteýdi kózdeıtin birqatar ýaqytyly sheshimder shyǵaryldy. Agroónerkásip keshenindegi ónimdilikti arttyrý maqsatynda salyq zańnamasyna naqty tetikter engizildi. Kásipkerlik qyzmet úshin jaǵdaılardy túbegeıli jaqsartatyn jáne el ekonomıkasynyń bıznes qatysatyn salalaryna memlekettiń aralasýyn shekteıtin mańyzdy zańdar qabyldandy»,-dedi Q. Toqaev.
Bul rette palata spıkeri kásipkerlikti damytý máselesi aldaǵy sessııa barysynda da basym baǵyt retinde qala beretinin atap ótti. Onyń aıtýynsha, aldaǵy ýaqytta Kásipkerlik kodeksiniń jobasy men ózin-ózi retteıtin uıymdar qyzmeti týraly zań jobalary qaralatyn bolady. Osy rette Senat Tóraǵasy qabyldanatyn zań jobalarynyń sapasy áli de ózekti kúıinde qalyp otyrǵanyn alǵa tartyp, keıbir jaǵdaılarda mınıstrlikter tarapynan zań jobalarynyń mazmunyna nazar aýdarmastan asyǵys ázirlenetinin atap ótti.
«Búgingi otyrysty paıdalana otyryp, Úkimettiń nazaryn osy problemaǵa aýdarǵym keledi», - dedi Q. Toqaev.
