Úkimet zań jobalaryn memlekettik tilde daıyndaý isinde áli kúnge eski ádetten aryla almaı keledi - O. Muhamedjanov
ASTANA. Naýryzdyń 19-y. QazAqparat /Qanat Mámetqazyuly/ - Úkimet zań jobalaryn memlekettik tilde daıyndaý isinde áli kúnge eski ádetten aryla almaı keledi.
Bul týraly búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda «Bir tilde sóıleý - birlik bastaýy» taqyrybynda baıandama jasaǵan Májilis tóraǵasy Oral Muhamedjanov osylaı málim etti, dep habarlaıdy QazAqparat.
«Til máselesinde barlyǵymyz úshin baǵdarsham bolýǵa tıisti zańnamalyq aktiler bar. Olardyń birinshisi - «Qazaqstan Respýblıkasy tilder týraly» zańy. Odan keıin tilderdi qoldaný men damytýdyń memlekettik baǵdarlamasy. Endeshe, osy negizgi qujattarda qamtylǵan biraz jaıt oryndalmaı keledi. Máselen, til týraly zańnyń 4-babynda «Memlekettik til - memlekettiń búkil aýmaǵynda qoǵamdyq qatynastardyń barlyq salasynda qoldanylatyn memlekettik basqarý, zań shyǵarý, sot isin jáne is qaǵazdaryn júrgizý tili», dep jazylǵan. Biraq, osy qaǵıdany oıdaǵydaı júzege asyrýda memlekettik organdarda naqty áreket tipti jetkiliksiz. Respýblıkanyń memlekettik organdary men uıymdarynda zańdardy, qaýly-qarardy, basqa da resmı qujattardy jaýapty adamdar negizinen orys tilinde daıyndaıdy, al memlekettik tildegi nusqasyn ázirleý aýdarmashynyń enshisine beriledi», dedi O. Muhamedjanov.
Sonymen birge palata tóraǵasy zań shyǵarý jumysyna tikeleı qatysy bar bolǵandyqtan memlekettik tilde zań ázirleý máselesine keńinen toqtaldy. Onyń sózine qaraǵanda memlekettik tilde zań jobalaryn ázirleý tóńireginde isten góri sóz kóp. «Úkimet zań jobalaryn memlekettik tilde daıyndaý isinde áli kúnge eski ádetinen aryla almaı keledi. Zań jobalary aldymen orys tilinde ázirlenip, sodan keıin ǵana memlekettik tilge aýdarylyp júr. Zań shyǵarýshy organ bolǵandyqtan biz úshin eń úlken sheshilmegen másele osy. Al Úkimettiń memlekettik tilde zańnamalyq aktiler ázirleý qoldan kelmeıdi eken, endeshe tym bolmasa olardy aýdarý sapasyn jaqsartý jónindegi áńgimeniń aıtylyp kele jatqany qashan? Alaıda, Úkimet keńsesi Májiliske túsetin zań aktilerine memlekettik tilde saraptama júrgizip, aýdarma sapasyn tekseretin bir qurylym jasaqtaýdy júzege asyra almaı otyr. Sondyqtan bul máselede aldaǵy ýaqytta Úkimet tarapynan naqty is-sharalar kútemiz», dedi O. Muhamedjanov.
