Úkimet úıinde Ulttyq qordan bólingen qarajatty ıgerý máselesi boıynsha keńes ótti

ASTANA. QazAqparat - Búgin Úkimet úıinde Premer-mınıstrdiń birinshi orynbasary Baqytjan Saǵyntaev Ulttyq qordan bólingen qarajatty ıgerý máselesi boıynsha keńes ótkizdi, dep habarlady QR Úkimettiń baspasóz qyzmetinen.

Memleket basshysynyń tapsyrmasymen Qazaqstan Damý banki (QDB) men «Damý» kásipkerlikti damytý qoryna Ulttyq qordan óńdeý ónerkásibindegi kásipkerlik sýbektilerine qoldaý kórsetý úshin qarajat bólingen.

QDB jelisi boıynsha ınvestıtsııalyq jobalardy merzimge deıin jeńildikpen nesıelendirý kelesi talaptar arqyly júzege asyrylady: ataýly syıaqy mólsherlemesi - 6 paıyzdan aspaıtyn jyldyq mólsherleme, nesıelendirý merzimi - 10 jylǵa deıin, negizgi qaryzdy óteýdiń jeńildik kezeńi - 24 aı, bir qaryzǵa alýshyny qarjylandyrý lımıti - 200 mln. teńgeden bastap 5 mlrd. teńgege deıin.

2014 jyldyń jeltoqsan aıynda 500 mlrd. teńge kólemindegi birinshi transh bólingen, aǵymdaǵy jyldyń naýryz aıynda bank taǵy 50 mlrd. teńge aldy. 4 maýsymdaǵy jaǵdaı boıynsha iri kásipkerlik sýbektileriniń jalpy somasy 46 mlrd 442,3 mln teńgeni quraıtyn 39 jobasy maquldanǵan.

«Damý» qory arqyly jeńildik nesıelendirýdi shaǵyn jáne orta kásipkerliktiń sýbektileri kelesi talaptarmen alady: ataýly syıaqy mólsherlemesi - 6 paıyzdan aspaıtyn jyldyq mólsherleme, nesıe jelisi boıynsha qoljetimdilik kezeńi - bir jylǵa deıin, bir qaryzǵa alýshyny qarjylandyrý lımıti - 1 850 mln. teńge.

Ótken jyly bólingen 50 mlrd. teńge kólemindegi transh pen naýryz aıynda bólingen 50 mlrd. teńgeden óńdeý ónerkásibi men qyzmet kórsetý salasyndaǵy ShOB sýbektileriniń jalpy somasy 80 750 mln. teńgeni quraıtyn 425 jobasy maquldanǵan.

Keńes qorytyndylary boıynsha «Báıterek» basqarýshy holdıngi, «Damý» qory jáne Qazaqstannyń Damý bankine banktarmen birlesip Ulttyq qordan bólingen qarajattardy ıgerý boıynsha jumysty jandandyrý tapsyryldy.