Úkimet úıinde sáıkestik sertıfıkatynsyz satylyp otyrǵan Iran tsementine qatysty másele kóterildi
ASTANA. QazAqparat - Búgin Úkimet úıinde QR Premer-mınıstriniń Birinshi orynbasary Baqytjan Saǵyntaev ónerkásip ónimderiniń zańsyz aınalymyna qarsy áreket etý jónindegi Vedomstvoaralyq komıssııasynyń otyrysyn ótkizdi, dep habarlady primeminister.kz.
Otyrysqa qatysýshylar Qazaqstanda sáıkestik sertıfıkattarynsyz satylyp otyrǵan Iran tsementin ımporttaý máselesin qarady. 2011 jyldyń basynan beri Qazaqstan aýmaǵyna kirgizilip otyrǵan ırandyq tsementtiń kólemi 6 ese ósip, 2014 jyly 241 150 tonnany quraǵan. Irannan ımporttalatyn tsementtiń ósip ketken kólemi tómen baǵa jaǵdaıynda qazaqstandyq tutynýshylardyń ónimderiniń básekege qabilettiligine aıtarlyqtaı áser etip, búkil otandyq tsement ónerkásibine kúrdeli zııan keltirý qaýpin arttyryp otyr.
Otyrys qorytyndysy boıynsha Ulttyq ekonomıka mınıstrligine Investıtsııalar jáne damý mınıstrligimen birlesip ırandyq óndiris tsementiniń ımporty jáne ony satýmen aınalysatyn sýbektilerge qatysty olardyń sertıfıkattarynyń bolýy, ulttyq zańnama talaptarynyń tańbalanýyna sáıkes kelýi boıynsha tekserister ótkizý tapsyryldy.
Qarjy mınıstrligi Investıtsııalar jáne damý mınıstrligimen birlese otyryp, bir aılyq merzimde ımporttaýshylardyń kirgizilgen ónimniń sáıkestiligin rastaıtyn qujattarynyń zańdylyǵy boıynsha jumys ótkizip, tsementtiń sáıkestik sertıfıkattarynsyz ımporttalýyna jol bermeý boıynsha sharalar qoldanýy tıis.
Baqytjan Saǵyntaev sondaı-aq, memlekettik organdarǵa kontrafaktilik akkýmýlıatorlar men kabeldik-ótkizgish ónimderdi ımporttaýshylar men satýshylarǵa qatysty sharalar qoldanýdy tapsyrdy.
