Úkimet úıinde Baqytjan Saǵyntaev «jasyl ekonomıkaǵa» kóshý máseleleri jóninde keńes ótkizdi
ASTANA. QazAqparat - Búgin Úkimet úıinde QR Premer-Mınıstriniń Birinshi orynbasary Baqytjan Saǵyntaev «jasyl ekonomıkaǵa» kóshý máseleleri jóninde keńes ótkizdi, dep habarlady primeminister.kz.
Klımattyń ózgerýi týraly BUU-nyń Shekti Konventsııasy jáne Kıoto hattamasy, sondaı-aq «jasyl ekonomıkaǵa» kóshý boıynsha Tujyrymdama boıynsha mindettemelerdi júzege asyrý aıasynda Qazaqstan óndiristerdiń energııa tıimdiligin arttyrý, jańartylmaly energııa kózderin engizý jáne parnıktik gazdardyń shyǵarylýyn azaıtý boıynsha jumystar júrgizýde.
Jeltoqsan aıynda Parıjde Kıoto hattamasynyń ornyna qabyldanýy josparlanǵan jańa klımattyq kelisimde halyqaralyq deńgeıde parnıktik gazdardyń shyǵarylýyn retteýdi kúsheıtý, kómirtektiń shyǵarylýyna standarttar, tehnologııalyq talaptar, kvotalar engizý jáne halyqaralyq jobalardy oryndaý kezinde shyǵarylýlardy esepke alý kútilýde.
Osyǵan baılanysty elder 2021 jyldan bastap, 2030 jylǵa deıingi aralyqta parnıktik gazdar shyǵarylýyn shekteý jáne/nemese qysqartý boıynsha ulttyq sandyq úlesti rettemeleýshi INDC (Intended nationally determined contributions) qujatyn qabyldaýy tıis.
Keńeske qatysýshylar INDC jobasynda 2021 jyldan bastap, 2030 jylǵa deıin parnıktik gazdar shyǵarylýyn 15% deńgeıde shekteý jáne/nemese qysqartý boıynsha shartsyz maqsatty, 2030 jylǵa deıin 1990 jyldyń bazalyq kórsetkishinen 25% shartty maqsatty aıqyndady.
