Úkimet úshemderge baspanany kezekten tys berý máselesin bolashaqta sheshýge ýáde berdi
ASTANA. QazAqparat - Senatorlar Úkimetten úshemderge baspanany kezekten tys beretin zań normasyn keleshekte qabyldaıtynyna úmit bildiredi. Búgin Parlament Senatynyń jalpy otyrysynda turǵyn úı qatynastary máselesine arnalǵan zań jobasyn talqylaý barysynda osy másele kóterildi.
Eske sala keteıik, zań jobasynyń aıasynda senator Qýanysh Aıtahanov úshem tapqan analarǵa baspanany kezeksiz berý máselesin kótergen bolatyn. Alaıda, Úkimet atalǵan normany ishinara ǵana qoldap, ondaı máseleni jergilikti atqarýshy organdarǵa óz múmkindikteri sheńberinde sheshýge joldaǵan.
«Zań jobasyn birinshi oqylymda qaraý barysynda úshem jáne odan kóp bala týǵan adamdarǵa memlekettik turǵyn úı qorynan kezekten tys quqyq berilsin degen normany engizý usynylǵan edi. Alaıda, bul normanyń shyǵyndylyǵyna baılanysty Úkimet teris qorytyndy berip otyr. Sonda shyǵyn bolatyn bıýdjet qarjysy nebári 500-600 mln. teńge eken, odan da az bolýy múmkin. Úkimet óz jaýabynda bul normany jergilikti atqarýshy organdarǵa úshem jáne odan da kóp bala týǵan analardy kótermeleý quqyǵyn berý jolymen jergilikti bıýdjettiń múmkindigi sheńberinde sheshýge bolady dep sanaıdy. Al nege buny zańmen sheshpeıdi. Óıtkeni, jergilikti atqarýshy organdar bul máseleni qazirdiń ózinde múmkindik sheńberinde, zańsyz jolmen sheship otyr ǵoı. Bizdiń bar ótinishimiz jergilikti ákimdikterge zańdy jolyn taýyp berý ǵana bolatyn», - dedi Qýanysh Aıtahanuly.
Bul rette senator atqarýshy bılikten atalǵan máseleniń qoldaý tappaǵanyna ókinish bildirdi. «Endeshe Úkimet ózderiniń jaýabynda aıtqanyndaı, aldaǵy ýaqytta jergilikti atqarýshy organdar týraly zańǵa ózgerister engizip, onda ákimderge úshem týǵan ata-analardy baspanamen kezekten tys qamtamasyz etýge mindetteıtin normany sheship berýi kerek», - dedi Q. Aıtahanuly.
Dál osy máseleni senator Ertarǵyn Astaev ta qoldady. «Elbasy Qazaqstan halqynyń sanyn arttyrý úshin Úkimetke tolyqqandy sharalar qabyldaýdy basym túrde aıtqan. Úshem týralyǵa kelsek, Úkimet bar máseleni qarajatqa tirep otyr. Al resmı organnyń aqparatyna qaraǵanda «Altyn alqa» járdemaqysyn alatyn adamdar sany 74 myń áıel, al úshemdi dúnıege ákelgender odan da az. Sonymen qatar, úshem - bul adamdardyń josparlaǵan jumysy emes, bul - tabıǵattyń bergen syıy, Qudaıdyń jarylqaýy», - dedi E. Astaev. Onyń sózine qaraǵanda, 2013 jyly elimizde úshem tapqan analar sany 50 ǵana bolsa, 2014 jyly 43 boldy. Eger úsh bólmeli páterdi sanaǵannyń ózinde olarǵa ketetin shyǵyn 300-700 mln. teńge aralyǵynda.
«Men osy suraq qaıta qaralýy kerek dep sanaımyn», - dedi E. Astaev.
Al taǵy bir senator Sársenbaı Eńsegenov máseleniń ózekti ekenin aıta kele, úsh jáne odan da kóp bala týǵan analarǵa kezeksiz páter berý máselesi qoldaý tappaǵanymen, Úkimet bul máseleni bolashaqta sheshýge ýáde bergen.
«Keshe komıtettiń keńeıtilgen otyrysynda mınıstrlik ókili muny qoldaıtynyn aıtty. Bolashaqta jergilikti atqarýshy organdar týraly zańǵa ózgerister engiziletinine naqty jaýap berdi. Endeshe, osyǵan senemiz», - dedi S. Eńsegenov.
