Úkimet «Ulttyq panteon» ınfraqurylysyna 1 mlrd. teńge bóldi
ASTANA. QazAqparat - Astanada QR «Ulttyq pantonynyń» úzdik eskız-ıdeıalary tanystyryldy. Baıqaýǵa qatysý úshin 7 kompanııa, sonyń ishinde osy sııaqty nysandardy jobalaýda tájirıbesi bar 3 sheteldik (AQSh, Italııa, Iran) jáne 4 qazaqstandyq kompanııa shaqyryldy, dep habarlady astana.kz.
«Atap aıtqanda, «KAZGOR» JShS, Qazaqstan sáýletshiler odaǵy, Qazaqstan dızaınerler odaǵy, «Astana qalasy bas josparynyń ǴZJI» JShS. Ár kompanııa óziniń eskız-ıdeıalaryn usyndy. Baıqaýǵa qatysýǵa nıet bildirgen basqa kompanııalardan 13 usynys kelip tústi. Qazirgi kezde 20 eńbektiń barlyǵy elordalyq qala qurylysy keńesiniń qaraýyna jiberildi. Aldaǵy ýaqytta Memleket basshysy Nursultan Nazarbaevtyń qatysýymen ótetin astanany damytý máseleleri jónindegi keńeste baıqaý qorytyndysy shyǵarylady», delingen habarlamada. Eske sala keteıik, 16 qyrkúıek kúni Qazaqstan Respýblıkasynyń Úkimeti Qazaqstan Respýblıkasy Investıtsııalar jáne damý mınıstrligine 2014 jylǵa respýblıkalyq bıýdjette shuǵyl shyǵyndarǵa kózdelgen Qazaqstan Respýblıkasy Úkimetiniń rezervinen Qazaqstan Respýblıkasynyń Ulttyq panteonyna aparatyn ınjenerlik jeliler men kirme joldardyń qurylysy úshin nysanaly damý transfertteri túrinde Astana qalasynyń ákimdigine aýdarý úshin 1 mıllıard teńge somasynda qarajat bólý týraly qaýly etti. Bul týraly «Ádilet» Qazaqstan Respýblıkasy normatıvtik quqyqtyq aktileriniń aqparattyq-quqyqtyq júıesi habarlaǵan bolatyn. «Astana qalasynyń ákimdigi Qazaqstan Respýblıkasy Investıtsııalar jáne damý mınıstrligine 2014 jylǵy 1 jeltoqsanǵa deıingi merzimde bólingen qarajattyń nysanaly paıdalanylýy boıynsha esep bersin», delingen qaýlyda.
