Úkimet Ulttyq qordyń qarajatyn paıdalanýdyń jańa tujyrymdamasyn bekitýge usynýy tıis - M. Nárikbaev
ASTANA. Aqpannyń 19-y. QazAqparat /Qanat Mámetqazyuly/ - Úkimet 2010 jyldyń birinshi toqsanynyń sońyna deıin Ulttyq qordyń qarajatyn qalyptastyrý jáne paıdalanýdyń jańa tujyrymdamasyn bekitýge usynýy tıis.
Búgin QR Parlamenti Májilisi janyndaǵy Qoǵamdyq palatanyń otyrysynda «Quqyq qorǵaý júıesin reformalaý jáne onyń odan ári izgilenýi» taqyrybynda baıandama jasaǵan Palata tóraǵasynyń orynbasary Maqsut Nárikbaev osylaı málim etti, dep habarlaıdy QazAqparat.
«Memleket basshysy aǵymdaǵy jylǵy halyqqa joldaýynda Ulttyq qordyń 8 mlrd. dollardan aspaıtyn qarajaty jyl saıyn elimizdi ındýstrııalandyrý sharalaryn qarjylandyrýǵa jumsalýy tıistigin aıtty. Osyǵan sáıkes, Úkimet 2010 jyldyń birinshi toqsanynyń sońyna deıin Ulttyq qordyń qarajatyn qalyptastyrý jáne paıdalanýdyń jańa tujyrymdamasyn bekitýge usynýy tıis», dedi M. Nárikbaev. Sonymen birge, atalǵan máseleniń ózektiligin esepke alǵan ol, jańa tujyrymdamanyń negizgi qaǵıdattaryna qatysty pikirin bildirdi. Onyń paıymdaýynsha, Ulttyq qordyń qarajattaryn basqarý tetigi boıynsha fýnktsııalaýdyń eki tártibi qarastyrylýy shart. «Onyń biri - ekonomıkanyń qalypty jaǵdaıyndaǵy fýnktsııalaý bolsa, ekinshisi - daǵdarys kezeńindegi ekonomıkany basqarý qyzmeti. Ulttyq qordan qarajatty bólý qaıtarymdylyq jáne qaıtarymsyzdyq qaǵıdattaryn eske ala otyryp, júrgizilgeni oryndy», dedi M. Nárikbaev.
