Úkimet Ulttyq qordyń qaldyǵyn JІÓ-men baılanysty belgileýdiń sebebin túsindirdi
NUR-SULTAN. QazAqparat – Úkimet basshysynyń birinshi orynbasary Álıhan Smaıylov Májilis depýtattarynyń saýalyna bergen jaýabynda Ulttyq qordyń qaldyǵyn JІÓ-men baılanysty belgileýdiń sebebin túsindirdi, dep habarlaıdy QazAqparat tilshisi.
Premer-Mınıstrdiń birinshi orynbasary óz jaýabynda Prezıdent tapsyrmasy boıynsha 2021 jyldan bastap Ulttyq qordan alynatyn transfert áleýmettik jáne ınfraqurylymdyq damýdy qamtamasyz etý úshin ǵana jumsalatyn alǵa tartady. Ulttyq qordyń transfertterin daǵdarys kezinde paıdalanýdyń Tujyrymdamasy boıynsha ǵana myna sharýalarǵa ǵana jumsalmaq:
- ekonomıkanyń quldyraýy nemese ekonomıkanyń ósý qarqynynyń baıaýlaýy kezeńderinde daǵdarysqa qarsy baǵdarlamalardy;
- ulttyq aýqymdaǵy ózin-ózi aqtamaıtyn áleýmettik mańyzy bar jobalardy, strategııalyq mańyzy bar ınfraqurylymdyq jobalardy qarjylandyrýdyń balama kózderi bolmaǵan kezde olardy qarjylandyrý úshin bólinedi.
«2021 jylǵa kózdelgen nysanaly transfertter densaýlyq saqtaý, bilim berý, ekologııa, eldiń básekege qabilettiligin arttyrý, makroekonomıkalyq basqarý jáne basqa da salalardaǵy jobalardy iske asyrýǵa baǵyttalǵan. Osylaısha, qoldanystaǵy normatıvtik quqyqtyq aktilerde nysanaly transferttermen qarjylandyrý parametrleri reglamenttelgen», - degen Premer-Mınıstrdiń birinshi orynbasary esepti Ulttyq qordyń tómendemeıtin qaldyǵyn qarjy jylyndaǵy ınvestıtsııalyq kiristiń keminde 70%-y mólsherinde aıqyndaý týraly usynysty orynsyz dep baǵalaǵan.
«Ulttyq qor qarajatynyń tómendetilmeıtin qaldyǵy boıynsha tıisti jyldyń sońyndaǵy JІÓ-niń boljamdy mániniń 30%-y mólsherinde qoldanystaǵy shekteýdi, sondaı-aq munaıǵa kesimdi baǵaǵa baılanystyrylǵan kepildendirilgen transferttiń kólemi boıynsha 2023 jyldan bastalatyn shekteýdi eskere otyryp, Ulttyq qordyń ınvestıtsııalyq kirisiniń deńgeıine qaraı transfertter kólemine qosymsha shekteý belgileý orynsyz. Ótkeni qarjy naryqtarynyń boljanbaýyna baılanysty kiristiliktiń aýytqýy, al jekelegen jyldary tipti teris bolýy múmkin. Sonymen qatar, bir parametr úshin birneshe shekteý belgileý tıimdi shara bolyp sanalmaıdy», - dep jazylǵan Álıhan Smaıylovtyń depýtattarǵa bergen jaýabynda.
Munyń sebebin Úkimet ókili keıin keıbir kezeńderde belgilengen shekteýler bir-birine qaıshy kelý yqtımaldyǵymen baılanystyrady.
«Ulttyq qordyń Tujyrymdamasynda:
- 2021 jylǵy 1 qańtardan bastap áleýmettik jáne ınfraqurylymdyq damýdy qamtamasyz etý úshin kepildendirilgen transferttiń nysanaly sıpatyn belgileý;
- Ulttyq qordyń jınaqtaý fýnktsııasynyń oryndalýyn qamtamasyz etý úshin 2023 jyldan bastap memlekettik shyǵystarǵa shekteýlerdi belgileý bóliginde bıýdjettik qaǵıdalardy kúsheıtý;
- bıýdjettiń munaıǵa qatysty emes tapshylyǵyn 2021 jylǵy JІÓ-ge qatysty 9,1%-dan 2025 jyly JІÓ-ge qatysty 6,0%-ǵa deıin birtindep tómendetý;
- 2022 jyldyń sońyna deıin Ulttyq qordyń aktıvterin konservatıvti bólýden (80% oblıgatsııalarda jáne 20% aktsııalarda) aktıvterdi teńgerimdi bólýge (60% oblıgatsııalar, 30% aktsııalar, 5% balama quraldar jáne 5% altynǵa deıin) kóshýdi kózdeıtin jańa strategııalyq bólýge kóshýdi qamtamasyz etý kózdelgen», - dep jazylǵan resmı jaýapta.
