Úkimet, Ulttyq bank pen Qarjy naryǵyn retteý agenttigi arasynda kelisim jasalmaq
NUR-SULTAN. QazAqparat - Makroekonomıkalyq saıasat sharalaryn úılestirý maqsatynda Úkimet, Ulttyq bank pen Qarjy naryǵyn retteý agenttigi arasynda kelisim jasalmaq. Bul týraly búgin Úkimet otyrysynda QR Ulttyq banki tóraǵasy Erbolat Dosaev aıtty, dep habarlaıdy QazAqparat tilshisi.
«Memleket basshysy Qasym-Jomart Kemeluly Toqaevtyń 2020 jylǵy 24 qańtardaǵy Úkimettiń keńeıtilgen otyrysynda bergen tapsyrmalaryna sáıkes biz Úkimettiń, Ulttyq banktiń jáne Qarjy naryǵyn retteý jáne damytý agenttiginiń tıisti is-sharalar josparyn kelistik», - dedi ol.
Osy rette Erbolat Dosaev Ulttyq bankke bekitilgen is-sharalar aıasynda atqarylatyn jumysqa toqtaldy.
«Aqsha-kredıt saıasatynyń tıimdiligin arttyrý, ınflıatsııalyq kútýlerdi turaqtandyrý jáne ekonomıkany uzaq merzimdi qorlandyrýdy qamtamasyz etý úshin biz osy jylǵy naýryzdyń sońyna deıin Aqsha-kredıt saıasatynyń 2030 jylǵa deıingi strategııasynyń jobasyn ázirleımiz. Saraptamalyq qaýymdastyq talqylaǵannan jáne múddeli memlekettik organdarmen kelisilgennen keıin joba 2020 jyldyń 1 shildesine deıin Ulttyq bank basqarmasyna usynylady», - dedi bank tóraǵasy.
Onyń atap ótýinshe, makroekonomıkalyq saıasat sharalaryn úılestirý maqsatynda osy jylǵy naýryzda Úkimet, Ulttyq bank pen Qarjy naryǵyn retteý jáne damytý agenttigi arasynda kelisim jasalady. Qujatta 2019 jyly bastalǵan makroekonomıkalyq saıasatty úılestirý jumysy jalǵastyrylady jáne qarjy júıesiniń turaqtylyǵy men jalpy ekonomıkalyq damý qajettiligi arasyndaǵy balansty qamtamasyz etý tásilderi ázirlenedi.
«Bizdiń oıymyzsha, kelisimde mynalar: azyq-túlik naryqtaryndaǵy básekelestikti arttyrý jáne retteletin qyzmetterge tarıfterdi tıimdi baqylaý sharalary; memlekettik baǵaly qaǵazdar naryǵyn damytý jáne 2-5 jyldyq oblıgatsııalardy basym túrde shyǵarý máseleleri; eksportty odan ári ártaraptandyrý jáne ımport aýystyrý boıynsha jumsalatyn kúsh; bankrottyq rásimderin, atap aıtqanda «bir teńge – bir daýys» rásimin jetildirý jumysyn jalǵastyrý, sondaı-aq onyń tıimdiligin arttyrý úshin bankrottyq rásimin júrgizý merzimderin shekteý qamtylýy tıis«, - dedi Erbolat Dosaev.
