Úkimet úlestik qurylysqa qatysýshylardyń múddesine negizdelgen zań jobasyn maquldady
ASTANA. QazAqparat - Búgin Úkimet otyrysynda Mınıstrler kabıneti turǵyn úı qurylysyna úlestik qatysý týraly zań jobasyn maquldady. Bul týraly búgin Ortalyq kommýnıkatsııalar qyzmetindegi brıfıngte QR Óńirlik damý mınıstri Bolat Jámishev málim etti.
Onyń sózine qaraǵanda, búginde úlestik qurylys zańnamasy kúrdeli jáne ol tıisti deńgeıde jumys istemeı otyr. «Osy ýaqytta tek bir ǵana lıtsenzııa berilip, ol boıynsha esh nysan salynbady. Qazirgi kezde osy baǵytta zań jobasy ázirlenip, qujat úlestik qurylysqa qatysýshylardyń táýekelin tómendetýdi qarastyrady», - dedi B. Jámishev.
Atap aıtqanda, jańa zań jobasy aıasynda eki tetik qarastyrylǵan. Onyń birinshisinde, qurylysshy nemese jobalaýshy kompanııa bankten nesıelendiriledi. Bul turǵyda úleskerlerdiń qarjysyn nóldik tsıkl kezeńinen ǵana tartýǵa bolady. «ıAǵnı, qurylysshy úleskerlerdiń qarjysyn tartýdyń aldynda jobaǵa óziniń jeke qarjysynyń 20-30 paıyzyn salýy tıis», - dedi B. Jámishev.
Onyń aıtýynsha, budan keıin ınjınırıngtik kompanııamen kelisim bekitilip, bul kompanııa qarjynyń maqsatty ıgerilýin qadaǵalaıdy.
Al ekinshi tetikte banktik nesıe eskerilmegen. «Bul jaǵdaıda talaptar joǵary. Osy baǵytta úleskerlerdiń qarjysyn nysannyń qańqasy turǵyzylǵannan keıin ǵana tartýǵa bolady. Bul tetikte de ınjınırıngtik kompanııa qarjynyń maqsatty jumsalýyn qadaǵalaıdy. Atap aıtqanda, osy qadamdar qurylysqa qatysýshy úleskerlerdiń táýekelin tómendetedi», - dedi B. Jámishev.
