Úkimet úleskerler qarajatynyń kepildik qoryn qurý máselesin qarastyryp jatyr - E. Dosaev

ASTANA. QazAqparat - Úkimet úleskerler qarajatynyń kepildik qoryn qurý máselesin qarastyryp jatyr. Bul týraly búgin Májiliste «Qazaqstan Respýblıkasynyń Úkimeti týraly» Konstıtýtsııalyq zańǵa ózgerister engizý týraly» zań jobasynyń tanystyrylymy barysynda Ulttyq ekonomıka mınıstri Erbolat Dosaev málim etti.

«Biz osy baǵyttaǵy tetikti qarastyryp jatyrmyz. Bizde úlestik salym máselesi boıynsha arnaıy kepildendirilgen qor qurý máselesi bar. Bul - Ońtústik Koreıanyń tájirıbesi. Bul jumysty biz «Báıterek» ulttyq holdıngimen aǵymdaǵy jyldyń qyrkúıek aıynyń sońyna deıin aıaqtaıtyn bolamyz, tıisti tolyqtyrýlar men ózgerister de qajet. Soǵan oraı, 2015 jyldyń 1 qańtaryna deıin úleskerler qarajatyn qatań retteý jónindegi zańnamalyq bazany ázirleımiz dep oılaımyn», - deıdi E. Dosaev.

Onyń sózine qaraǵanda, zań jobasy aıasynda qurylys kompanııalaryna talaptardy qataıtý jónindegi jalpy normalar da enýi múmkin.