Úkimet Túrkistandy damytý boıynsha 5 qaýly qabyldady - Ómirzaq Shókeev

TÚRKІSTAN. QazAqparat - Búgin Túrkistan qalasynda oblystyq máslıhattyń sessııasy ótti. Alqaly jıynda Túrkistan oblysynyń ákimi Ómirzaq Shókeev óńirdi damytý baǵytyndaǵy josparlary men atqarylatyn jumystar jóninde baıandady, dep habarlaıdy QazAqparat ákimdiktiń baspasóz qyzmetine silteme jasap.

«Elbasynyń Túrkistandy tek oblys ortalyǵy ǵana emes, jalpy túrki áleminiń mádenı-rýhanı ortalyǵy retinde damytý jónindegi tapsyrmasyn oryndaý maqsatynda osy bir aıdyń kóleminde Úkimet tarapynan oblys úshin asa mańyzdy 5 qaýly qabyldandy. Bul - tarıhta bolmaǵan jaǵdaı. Onyń oblys jáne Túrkistan qalasy úshin eń mańyzdysy - «Túrkistan oblysyn áleýmettik-ekonomıkalyq damytýdyń 2024 jylǵa deıingi keshendi jospary». Sonymen birge, ózge qaýlylar da Túrkistan úshin asa mańyzdy. Oblysymyzǵa memleket tarapynan aıryqsha qoldaý kórsetilip otyr», - dedi oblys ákimi.

El Úkimeti tarapynan joǵaryda atalǵan qaýlydan bólek «Túrkistan qalasyn salý sheńberinde jumystar jáne kórsetiletin qyzmetter satyp alynatyn tulǵalardy aıqyndaý» jónindegi qaýly da mańyzǵa ıe. Sondaı-aq «TURKISTAN» erkin ekonomıkalyq aımaǵy men ákimshilik-iskerlik ortalyǵyn, Túrkistan qalasyn damytý kózdelgen qaýlylar oblysty órkendetýge oń áserin tıgizetini anyq.

Úkimet qabyldaǵan qaýlylarǵa sáıkes, oblysta barlyq sala boıynsha aýqymdy jumystar atqarylady. Aýyl sharýashylyǵy, qurylys, ıdeologııa, óndiris, ındýstrıaldy aımaqtardy damytý jolynda úlken josparlar júzege asyrylady.

Máselen, týrızm salasynda ekologııalyq, tarıhı-mádenı jáne tanymdyq baǵytta 57 týrıstik marshrýt ázirlengen. Qasqasý týrıstik-rekreatsııalyq kesheniniń qurylysy barysynda 1900 jumys orny ashylsa, iske qosylǵanda 400 turaqty jumys orny ashylmaq. Jylyna keletin týrıster sany da arta túspek.

Óńirde ınfraqurylym jaqsarady. Barlyq aýdan, qalalarda aýyz sý, gazben qamtý, sapaly elektr máseleleri boıynsha tııanaqty jumystar atqarylady. Gaz máselesi de sheshimin taýyp keledi. Eki aıda 30 eldi mekenge «kógildir otyn» tartylyp, 45 myń adam gazǵa qol jetkizdi. Bul jumys ary qaraı da jalǵasyn taýyp, osy jyldyń 1 qyrkúıegine deıin 48 eldi mekenge gaz tartý josparda bar.

2019 jyldyń sońyna deıin ortalyqtandyrylǵan sýmen jabdyqtalý kórsetkishi qalalarda 97,2 paıyzǵa, al, aýyldyq eldimekenderde 80,4 paıyzǵa jetedi dep josparlanyp otyr.

Túrkistan qalasyn damytý, qurylys nysandaryn talapqa saı júrgizý jumystary da josparǵa saı atqarylady. Bıyldyń ózinde birneshe iri nysan paıdalanýǵa beriledi.

Jıynda osy jáne ózge de derekterdi sóıletken óńir basshysy el Úkimeti tarapynan bólingen árbir tıyn el ıgiligi úshin jumsalyp, jumystardyń sapaly ári ýaqtyly oryndalýy basty nazarda bolatynyn jetkizdi.

Túrkistan oblystyq máslıhatynyń 38-shi sessııasynyń kún tárbibinde túrli salalar qamtylǵan 19 másele talqylanyp, mańyzdy sheshimder qabyldandy.