Úkimet Til týraly zań jobasyn ázirlep, Májiliske engizýi tıis - S. Esjanov
ASTANA. Mamyrdyń 5-i. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda depýtat Saýyrbaı Esjanov memlekettik til tóńiregindegi máselelerdi qaýzaı kele, Úkimetten til týraly zań jobasyn palata qaraýyna engizýdi surady,
dep habarlaıdy QazAqparat.
Óz sózinde depýtat qazaq tiliniń memlekettik til retindegi qoldaný aıasyn keńeıtý úshin birqatar sharalar júzege asqanyn, Til týraly zań, «Tilderdi qoldaný men damytýdyń 2001-2010 jyldarǵa arnalǵan memlekettik baǵdarlamasy» qabyldanǵanyn tilge tıek etti. Depýtattyń pikirinshe, bundaı mańyzdy sharalar qazaq tiliniń memleketti basqarý tili retindegi deńgeıin kóterdi. Ult tilindegi mektepter men balabaqshalarynyń kóbeıýine yqpal etip, buqaralyq aqparat quraldaryndaǵy ana tilimizdiń aıasyn keńitti.
«Degenmen de, til máselesine qatysty qabyldanǵan normatıvtik-quqyqtyq qujattardyń múmkindigi álige deıin tolyq paıdalanylmaı keledi. Sonymen birge qoldanystaǵy Til týraly zańǵa ózgerister men tolyqtyrýlar engizý qajettigi ýaqyt ótken saıyn aıqyndala túsýde. Biz osy kúnge deıin memlekettik tildiń básekege qabilettiligin arttyrý jónindegi 2007-2010 jyldarǵa arnalǵan tujyrymdama men tilderdi damytý baǵdarlamasynyń talaptaryn da tolyq júzege asyrǵan joqpyz. Sol baǵdarlamalarda memlekettik til saıasatyna baılanysty zańnamany udaıy jetildirip otyrý kózdelgen bolatyn», dedi S. Esjanov.
Sonymen birge, depýtat tildiń normatıvtik-quqyqtyq bazasyn ýaqytyly jetildirip otyrý sharasy is-qaǵazdaryn qazaq tiline kóshirý jóninde qoıylǵan mindetterdiń oryndalýyna da áser etetinin aıtty. «Qazirgi tańda elimizdegi atqarýshy organdardyń is-qaǵazdarynyń memlekettik tildegi úlesi tómen. Oblys ákimshilikterindegi jaǵdaı da birkelki emes. Bul memlekettik basqarý qurylymdary men ondaǵy qyzmetkerlerdiń qazaq tiline degen yntasyn arttyrýdyń múmkindikteri tolyq qarastyrylmaı otyrǵanyn kórsetedi. Sondyqtan da atalǵan zań jobasy qaıta qaralyp, Qazaqstan Respýblıkasy Úkimetiniń tarapynan Májiliske engizilýi qajet dep esepteımiz. Til týraly zańnyń 23-babyndaǵy: «Memlekettik tildi belgili bir kólemde jáne biliktilik talaptaryna sáıkes bilýi qajet kásipterdiń, mamandyqtardyń jáne laýazymdardyń tizbesi Qazaqstan Respýblıkasy zańdarymen belgilenedi» degen talap oryndalýǵa tıis. Osy bir ǵana talapty júzege asyrý memlekettik tildiń qoldaný aıasyn aıtarlyqtaı keńeıter edi. Alǵashqy kezeńde qazaq tilin bilýge tıis kásipterdiń bárin emes, memlekettik qyzmetshilerdi qamtysaq ta jetkilikti dep oılaımyz», dedi depýtat.
