Úkimet teńgeniń AQSh dollaryna baǵamyn qaıta qarady

ASTANA. QazAqparat - Búgin Úkimet músheleriniń qaraýyna 2019-2023 jyldarǵa arnalǵan negizgi makrokórsetkishterdiń jáne 2019-2021 jyldarǵa arnalǵan bıýdjettik parametrlerdiń naqtylanýy máselesi engizildi. Atalǵan másele boıynsha QR Ulttyq ekonomıka mınıstri Tımýr Súleımenov baıandama jasady, dep habarlaıdy QazAqparat tilshisi.

Sońǵy eki aıda munaı baǵasy birshama qubylmalylyqty kórsetedi. Bıylǵy jyldyń qazan aıynyń basynda ol 86,2 AQSh dollaryn qurasa, 23 qarashada munaı baǵasy barreline 58,8 AQSh dollarǵa tómendedi. Aýytqý 32 paıyzdy qurady. Osyǵan oraı, álemdik naryqtardaǵy aǵymdaǵy jaǵdaıyn jáne halyqaralyq qarjy uıymdarynyń boljamdaryn eskere otyryp boljamdy munaı baǵasy bir barrel úshin 60 AQSh dollarynan 55 AQSh dollaryna deıin tómendedi. Osyǵan baılanysty teńgeniń AQSh dollaryna baǵamy qaıta qaraldy. Esepti baǵamdy 370 teńge deńgeıinde belgileýdi usynamyz», - dedi Tımýr Súleımenov.

Onyń aıtýynsha, jalpy ishki ónimniń naqty ósýi 2019 jyly 3,8  paıyzdy quraıdy. Bul rette jalpy ishki ónimniń ortasha jyldyq ósýi 4,1 paıyz bolady. 2019 jyly nomınaldy jalpy ishki ónim 64,0  trıllıon teńgeden 2023 jyly 86,5 trıllıon teńgege deıin ósedi. Jan basyna shaqqandaǵy jalpy ishki ónim 2019 jyly 9,4 myń AQSh dollaryn qurap, 2023 jyly 12,1 myń AQSh dollaryna deıin ulǵaıady. Óńdeý ónerkásibi 4,1, taý-ken óndirý 3,0 paıyzǵa ósýde. Aýyl sharýashylyǵynda -6,4, qurylys salasynda - 4,1, saýdada - 4,4 paıyz ósim kútiledi.

«Eksport kólemi 2019 jyly  54,1  mıllıard AQSh dollaryn quraıdy. 2023 jyly 65,7  mıllıard AQSh dollaryna deıin ulǵaıady. Import 2019 jyly  32,9  mıllıard AQSh dollarynan 2023 jyly 39,6 mıllıard AQSh dollarǵa deıin ósedi. Munaı óndirý kólemi 2019 jylǵy 88,0 mıllıon tonnadan 2023 jyly 99,0 mıllıon tonnaǵa deıin artady», - dedi Tımýr Súleımenov.

Mınıstrdiń dereginshe, 2019 jyly ınflıatsııa buryn maquldanǵan 4-6 paıyz deńgeıinde saqtalady. Al 2020-2023 jyldary3-4 paıyzǵa deıin tómendeıdi.