Úkimet tehnıkalyq-kásiptik bilim salasyna bólinetin memlekettik tapsyrysty arttyrady

NUR-SULTAN. QazAqparat – Memleket basshysy Qasym-Jomart Toqaev elimizdegi tehnıkalq-kásiptik bilim beretin kolledjderdi reformalaýdyń joldaryn atady, dep habarlaıdy QazAqparat tilshisi.

«Tehnıkalyq-kásiptik bilimdi ary qaraı damytý kerek. «Jas maman» jobasy aıasynda 180 kolledjdiń materıaldyq-tehnıkalyq bazasyn jańartyp jatyrmyz. Tegin tehnıkalyq bilim berý baǵdarlamasymen jyl saıyn 100 myń stýdent qamtylady. Az qamtylǵan jáne kópbalaly otbasylardan shyqqan balalar jeke nazardy qajet etedi. Úkimet tehnıkalyq-kásiptik bilimi bar kadrlardy daıyndaý úshin (atalǵan sanattaǵy jastar úshin de) memlekettik tapsyrysty arttyrý máselesin jetildirýi kerek», - dedi Prezıdent Ulttyq qoǵamdyq senim keńesiniń otyrysynda.

Memleket basshysy sonymen qatar tehnıkalyq-kásiptik bilim beretin kolledjderde akademııalyq eriktilikti engizý, nesıelik júıege kóshý, jas basyna eseptep qarjylandyrý – mańyzdy reformalarǵa aınalýy kerektigin málim etti.

«Bizdiń kásiptik baǵdar eńbek naryǵyndaǵy aldaǵy 10-15 jyl ishindegi qajettilikti eskerýi kerek. Ol úshin Bilim jáne ǵylym mınıstrligi «Jańa mamandyqtar men quziretterdiń atlasyn» engizýi tıis», - dedi ol.