Úkimet Taraz qalasy jáne Baızaq, Jambyl aýdandarynyń ákimshilik shekaralaryn ózgertý týraly qaýlynyń jobasyn maquldady

Atalǵan qujatty búgin Astanada ótken Úkimet otyrysynda Jambyl oblysynyń ákimi Qanat Bozymbaev tanystyrdy, dep habarlaıdy QazAqparat.

«Taraz qalasy halqynyń sany sońǵy halyq sanaǵy boıynsha 349 myń adam. Qala aýmaǵy 12 myń 800 gektar. Keıingi jyldary Taraz qalasy halqynyń sany birshama ósti. Atap aıtqanda, 2013 jyly qala turǵyndarynyń sany 365 myńǵa, al 2025 jyly 500 myńǵa jetedi dep eseptelip otyr. Tarazda turǵyn úı qurylysy úshin jer telimderin bólý erekshe ótkir másele bolyp otyr», dedi ákim.

Onyń aıtýynsha, Baızaq jáne Jambyl qala mańy aýdandary jeriniń esebinen oblys ortalyǵynyń shekarasyn 5 myń 953 gektarǵa keńeıtý boıynsha daıyndyq jumystary aıaqtaldy.

10 shaqyrym uzaqtyqta aýmaqty keńeıtý negizinen qalanyń ońtústik-batys bóliginde belgilenip otyr. Keńeıtiletin jer aýmaǵyna ásirese aýyl sharýashylyǵy, sharýa qojalyqtarynyń, memlekettik qordyń jerleri engen. «Sharýa qojalyqtarynyń jerlerin satyp alýǵa 162 mıllıon teńge qarastyrylǵan»,dedi Q. Bozymbaev.