Úkimet tarapynan memlekettik tildiń damýyna jan-jaqty materıaldyq-tehnıkalyq jáne qarjylaı qoldaý jalǵasa beretin bolady - QR Premer-Mınıstri
ASTANA. Naýryzdyń 19-y. QazAqparat /Qanat Mámetqazyuly/ - Úkimet tarapynan memlekettik tildiń damýyna jan-jaqty materıaldyq-tehnıkalyq jáne qarjylaı qoldaý jalǵasa beretin bolady. Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııaǵa joldaǵan hatynda QR Premer-Mınıstri Kárim Másimov osylaı málimdedi.
Úkimet basshysynyń joldaǵan hatyn jıynǵan jetekshilik etken QR Parlamenti Májilisi Tóraǵasynyń orynbasary Jánibek Káribjanov oqyp berdi, dep habarlaıdy QazAqparat.
«Elbasy N. Nazarbaevtyń aǵymdaǵy jylǵy Joldaýynda belgilengendeı, aldaǵy kezeńder jańa ekonomıkalyq órleýmen qatar, elimizdiń jańa múmkindikterine jol ashyp otyr. Osy maqsatta aldymen elimizde mádenı-rýhanı damýǵa qol jetkizip qana qoımaı, qoǵamdyq kelisim men turaqtylyqty saqtaý, el qaýipsizdigin nyǵaıtý baǵytynda mańyzdy faktordyń biri bolyp otyrǵan - memlekettik til saıasatynyń orny qashan da bólek. Bul eń aldymen Qazaqstannyń búginde EQYU-ǵa tóraǵalyq etýi kezeńinde memlekettik til bolyp tabylatyn - qazaq tiliniń mártebesin kóterý, onyń bedelin, álemdik básekedegi qabilettiligin arttyrýǵa jumyldyrýǵa tıis ekendigimizdi kórsetip otyr. Bıyl tilderdi qoldaný men damytýdyń 2001-2010 jyldarǵa arnalǵan memlekettik baǵdarlamasy máresine jetip keledi. Baǵdarlama óziniń tarıhı mindetin oryndady. Respýblıkanyń memlekettik bılik pen basqarý organdarynyń barlyǵy is júrgizýdi memelkettik tilge kóshirdi dep aıtýǵa bolady. Memlekettik til saıasaty barlyq salada óz deńgeıinde júzege asty. Elbasynyń tapsyrmasy boıynsha aldaǵy ýaqytta 2011-2020 jyldarǵa arnalǵan til baǵdarlamasyn ázirlep, qabyldaýǵa baılanysty jumystar júrgizilýde. Úkimet tarapynan osy baǵytta memlekettik tildiń damýyna jan-jaqty materıaldyq-tehnıkalyq jáne qarjylaı qoldaý jalǵasa beretin bolady, dep sendiremin», delingen Úkimet basshysynyń hatynda.
Sonymen birge, K. Másimov konferentsııaǵa qatysýshylarǵa, til janashyrlaryna alǵysyn bildirip, jıynnyń memlekettik tildiń qoǵamda laıyqty ornyn alýyna orasan septigin tıgizedi dep sanaıtyndyǵyn jetkizedi. «Konferentsııa sátti ótsin, týǵan tilimizdiń ıgilikti nátıjesine qol jetkizýge jarqyn jol ashsyn», delingen joldaýda.
