Úkimet sheteldik ınvestıtsııalardy tartýdyń jańa tásilderin talqylaıdy

NUR-SULTAN. QazAqparat - QR Premer-Mınıstri Asqar Mamın sheteldik ınvestıtsııalardy tartýdyń jańa tásilderin talqylaýǵa arnalǵan jıyn ótkizedi, dep xabarlaıdy QazAqparat tilshisi.

Úkimet basshysynyń aıtýynsha, qazirgi kezde álemdik ekonomıkanyń ósý qarqyny tómendeýde. Al xalyqaralyq sarapshylar men damý ınstıtýttarynyń boljamy boıynsha álemdik ekonomıkanyń ósý qarqyny 2018 jylǵy 3,6 paıyzdan aǵymdaǵy jyly 3,3 paıyzǵa deıin tómendeıdi.

"Osyndaı jaǵdaıda ekonomıkanyń ınklıýzıvti ári sapaly damýyn qamtamasyz etý - asa mańyzdy mindet. Ekonomıkanyń sapaly damýy negizgi kapıtalǵa salynatyn ınvestıtsııalarmen baılanysty. Sonyń ishinde tikeleı sheteldik ınvestıtsııalyq saıasat basym baǵyt bolyp tabylady. 18 sáýirde sheteldik ınvestıtsııalardy tartý boıynsha jańa tásilderdi talqylaý maqsatynda memlekettik organdar basshylary men ınvestıtsııalyq saıasatqa jaýapty ákim orynbasarlarynyń qatysýymen jınalysty ótkizemiz. Barlyq ortalyq jáne jergilikti memlekettik organdar ekonomıkanyń ósý qarqynyn arttyrýǵa tıisti sharalardy uıymdastyrý qajet", - dedi A.Mamın Úkimettiń búgingi otyrysynda.

Aıta keteıik, bıyl qańtar-naýryz aılarynda jalpy ishki ónim 3,8 paıyzǵa ósti. Ásirese, qurylys, saýda, taý-ken ónerkásibi men kólik salasynyń ósimi barynsha baıqalady.

"Negizgi kórsetkishter boıynsha birinshi toqsanda Shyǵys Qazaqstan, Atyraý, Qostanaı, Pavlodar men Qyzylorda oblystary jaqsy nátıjege jetti. Sonymen qatar, Aqmola oblysynda jáne elordada qurylys pen ınvestıtsııalar boıynsha kórsetkishter tómendep ketken. Osy baǵyttaǵy jumystardyń nashar deńgeıde uıymdastyrylǵanyn atap ótemin", - deıdi A.Mamın.