Úkimet sheteldik ınvestıtsııa tartý jumysyn eki baǵytta jalǵastyratyn bolady
ASTANA. QazAqparat - Úkimet sheteldik ınvestıtsııa tartý jumysyn eki baǵytta jalǵastyratyn bolady. Búgin Úkimet otyrysynyń qorytyndylaryna arnalǵan Ortalyq kommýnıkatsııalar qyzmetindegi brıfıng barysynda QR Premer-mınıstriniń orynbasary-Indýstrııa jáne jańa tehnologııalar mınıstri Áset Isekeshev osylaı málim etti.
Mınıstrdiń aıtýynsha, ındýstrııalandyrý saıasatyn júzege asyrýda, jalpy ekonomıkanyń damýynda ınvestıtsııalyq saıasat mańyzdy ról atqarady. «Degenmen, sońǵy ýaqytta álemdik daǵdarystyń saldarynan barlyq elderde ınvestıtsııalyq belsendilik tómendep ketti. BUU derekterine qaraǵanda, tikeleı sheteldik ınvestıtsııa tartý jaǵynan Qazaqstan 2012 jyly alǵashqy 20 elderdiń qataryna kirgenimen, jaǵymsyz úrdis sońǵy ýaqytta bizdiń elimizde de baıqaldy. Sondyqtan da, Elbasy Úkimetke ınvestıtsııa tartý jumysyn kúsheıtýdi, arnaıy jospar jasaýdy tapsyrǵan bolatyn», - dedi Á. Isekeshev. Mınıstrdiń aıtýynsha, osy josparǵa sáıkes, sheteldik ınvestıtsııa tartý boıynsha jumys eki baǵytta jalǵasatyn bolady. Onyń birinshisi - ınvestıtsııalyq klımatty odan ári jaqsartý. Osy baǵytta birqatar yntalandyrý sharalary qoldanylady. «Ekinshi baǵyt - iri ınvestorlardy, sonyń ishinde transulttyq kompanııalardy tartý. Bul maqsatta biz negizgi elder men salalardy aıqyndap aldyq. Jumystyń naqty algorıtmi de belgilendi. Bul jospar jaqynda ǵana Prezıdent Ákimshiligine joldandy. Ol qabyldanǵannan keıin birden jumysqa kirisemiz. Bizdiń jospar boıynsha basty maqsatymyz - Qazaqstandy óńirdegi eń myqty ınvestıtsııalyq habqa aınaldyrý», - dedi Á. Isekeshev.
