Úkimet shekaralyq óńirlerdi damytý jóninde arnaıy memlekettik baǵdarlama jasaýy kerek - Q. Sultanov
ASTANA. 14 naýryz. QazAqparat - Búgin QR Parlamenti Májilisiniń jalpy otyrysynda depýtat Qýanysh Sultanov Úkimet basshysynyń atyna saýal joldap, onda elimizdiń shekaralyq óńirlerin damytý máselesin kóterdi.
Saýal barysynda Elbasy Joldaýynda júktelgen óńirlerdi damytý máselelerine toqtaǵan depýtat, soǵan oraı Úkimet baǵdarlamasy aıasynda elimizdiń shekaralyq jaǵdaıyna arnaıy mán berilýi tıistigin atap ótti. Bul rette Qýanysh Sultanulynyń aıtýynsha, ásirese Qazaqstan-Qytaı shekaralyq óńirleriniń, áleýetiniń, eldiń turmysy, jumys orny, demografııalyq hal ahýaly, ákimshilik-aımaqtyq qurylymy Úkimet tarapynan jańa kózqarasty talap etedi.
«Qytaı Úkimeti 1990 jyldan beri qaraı batys óńirlerdi, ıaǵnı Shyńjań ólkesin damytý jóninde arnaıy memlekettik baǵdarlamany óte nátıjeli júzege asyrýda. Jarııalanǵan málimetter boıynsha on jylda Shyńjań ólkesiniń áleýmettik-ekonomıkalyq damýyna tek memleket qazynasynan 100 mlrd. dollardan astam qarjy quıyldy. Gongkong, Shanhaı, Beıjiń, Chenjen sııaqty qalalardyń buǵan qosqan úlesi eki esege deıin artyq», - deıdi Qýanysh Sultanuly. Depýtattyń sózine qaraǵanda, shekaranyń arǵy jaǵyna 100 shaqyrym endikke ishki Qytaıdan mıllıondaǵan adamdar kóshirilip jańa qalalar, ondaǵan eldi mekender qanat jaıǵan. Іri óndiris oryndary ashylyp, ınfraqurylymdar boı kótergen. «Qorǵastan 80 shaqyrymda turǵan Quljada bir kezde nebári 100 myńǵa tarta turǵyn bolsa, qazir onda 1 mln. nan astam «hansýlyqtar» turady. Kerisinshe, 1 myń 700 shaqyrym shekara uzyndyǵynyń Qazaqstan jaǵyndaǵy 100 shaqyrym endiginde turatyn barsha halyqtyń sany 400 myńnyń aınalasynda ǵana. Bul endiktegi eń úlken qala - 33 myń adam turatyn Járkent qalasy. Shekaralyq Raıymbek, Narynqol, Úsharal, Úrjar, Maqanshy, Kúrshim, Zaısan, Tarbaǵataı, Marqakól, Qatonqaraǵaı jáne taǵy basqa da eldi mekenderde halyq sany óte seldir. Onyń ústine 90-jyldary daǵdarystan quldyraǵan aýdandardan kóp adam kóship ketti», - deıdi Q. Sultanov.
Osyǵan oraı, depýtat shekara mańynda halyq sanyn ósirýge, turǵyndardy turaqtandyrýǵa qatysty sharalar jasalýy kerektigin atap ótti. «Sondyqtan Úkimet shekaralyq óńirlerdi damytý jóninde arnaıy memelkettik baǵdarlama jasap, tipti arnaıy zań qabyldaýy kerek dep bilemin. Ákimshilik aımaqtardy qaıta qurylymdaý, jańa jumys oryndaryn ashý, demografııalyq máseleler, ulttyq rýhanı sharalar jıyntyǵyn sol baǵdarlamada qarastyrǵany zaman suranysyna jaýap berer edi», - dedi Q. Sultanov.
