Úkimet shalǵaıdaǵy sharýalarǵa úlken qoldaý kórsetip otyr – Saıran Buqanov
QOSTANAI. QazAqparat – Qazaqstannyń Eńbek Eri Saıran Buqanov QR Prezıdentiniń Tótenshe jaǵdaı jónindegi memlekettik komıssııanyń otyrysyndaǵy tapsyrmalaryna qatysty pikir bildirdi, dep habarlaıdy QazAqparat.
Saıran Buqanovtyń aıtýynsha, agrarıılerdiń aldynda egis naýqanyn keshiktirmeýge kúsh salý mindeti tur.
«Qasym-Jomart Kemeluly kóptiń kókeıinde júrgen sózdi aıtty. Ras, tótenshe jaǵdaı kezindegi eń mańyzdy mindetterdiń biri – azyq-túlik qaýipsizdigin qamtamasyz etý. Qazir kóktemgi egis naýqany bastaldy. Bul – óte mańyzdy jumys. Sondyqtan, Úkimet jáne ákimdikter osy jumysty erekshe nazarda ustaýy qajet. Muny Prezıdent qadap turyp tapsyrdy. Tıisinshe biz de egis naýqanyn keshiktirmeýge kúsh salýymyz kerek», - deıdi Qazaqstannyń Eńbek Eri.
QR Prezıdenti: «Buryn-sońdy bolmaǵan aýyr daǵdarystan bizdiń halqymyz shırap, jańa kezeńge beıimdelip shyǵatynyna senimdimin. Qazaqstan mindetti túrde osy qıyndyqty eńserip, turaqty jáne sapaly órkendeý jolyna túsedi», - dep atap ótti. Rasymen de, memleket basshysynyń bul aıtqany kásibi turalap qalǵan sharýalarǵa serpin berip otyr.
«Pandemııa jaǵdaıynda halyqtyń alańdaýyn túsinýge bolady. Qazir jaǵdaı qıyn. Áıtse de, qol qýsyryp qarap otyrýǵa bolmaıdy. Aty jaman indet aýylǵa kelmesin dep tilep otyrmyz. Ol úshin úkimet, oblys basshylyǵy tıisti sharalardy qoldandy. Úkimet janar-jaǵarmaıdy lıtri 165 teńgeden berip otyr. Bul – úlken qoldaý. Tuqym qory jetkilikti. Sondyqtan taraptardy ártaraptandyryp, egistik kólemin azaıtpaımyz dep otyrmyz. Negizi daǵdarys elimizdiń keleshegi men onyń aldaǵy damýy týraly tereń oılanýǵa múmkindik beredi. Sondyqtan, bárimiz bir bolyp belsendi jumys júrgizýimiz kerek», – dedi S.Buqanov.
