Úkimet shalǵaıdaǵy eldimekender turǵyndaryna sapaly medıtsınalyq kómek kórsetý úshin 50 jyljymaly medıtsınalyq keshen satyp almaq
ASTANA. 21 jeltoqsan. QazAqparat - Elimizdiń shalǵaıdaǵy jáne jetýi qıyn óńirlerindegi aýyl turǵyndaryna sapaly medıtsınalyq kómektiń qoljetimdiligin arttyrý úshin Úkimet jalpy quny 4,3 mlrd. teńge turatyn 50 jyljymaly medıtsınalyq keshendi (JMK) satyp alý týraly sheshim qabyldady.
Bul týraly QR Dengsaýlyq mınıstrliginiń baspasóz qyzmeti habarlady.
Baspasóz qyzmetiniń málimetinshe, jyljymaly medıtsınalyq keshenderdi Kókshetaý qalasyndaǵy «Kazınjınırıng» ónerkásibi shyǵarady. Bundaı keshender Shymkenttegi «Kazmedprıbor» ónerkásibi jetkizetin qazirgi zamanǵy medıtsınalyq jabdyqtarmen jaraqtandyrylǵan jáne dárigerler brıgadalarymen qamtamasyz etilgen.
Mundaı keshender «Salamatty Qazaqstan» memlekettik baǵdarlamasynyń negizgi baǵyttaryn iske asyrýǵa múmkindik beredi. Atap aıtqanda, JMK dárigerleri jyl saıyn halyqtyń jalpy sanynyń jáne profılaktıkalyq tekserýlerdiń kem degende 30 paıyz bóligin qamtıtyn halyqtyń nysanaly toptaryna arnalǵan ulttyq skrınıngtik baǵdarlamalar keshenin ótkizedi. Bul aýrýlardy erte anyqtaýǵa, olardy ýaqtyly emdeýge, sondaı-aq asqynýlarǵa, múgedektikke jáne ólim-jitimge ákep soǵatyn aýrýlardyń aýyr belgilerin toqtatýǵa múmkindik beredi.
JMK-ler qyzmeti shalǵaıdaǵy aýyldyq eldi mekenderdiń turǵyndaryna mamandyrylǵan medıtsınalyq kómektiń qoljetimdiligin jaqsartýǵa, aýyldarda beıindi mamandardyń jáne medıtsınalyq-sanıtarııalyq alǵashqy kómek mamandarynyń jetkiliksizdigin ornyn toltyrýǵa múmkindik beredi.
Ótkiziletin is-sharalar 2,2 mıllıonnan astam aýyl turǵynyn medıtsınalyq tekserýmen jáne dıspanserleýmen múmkindik beredi. Bul tutastaı aýyl turǵyndarynyń densaýlyǵy kórsetkishterin jaqsartýǵa yqpal etedi.
