Úkimet saýdany damytatyn jańa baǵdarlamanyń tujyrymdamasyn bekitti
NUR-SULTAN. QazAqparat - Úkimet saýdany damytýdyń memlekettik baǵdarlamasynyń 2021-2025 jyldarǵa arnalǵan tujyrymdamasyn bekitti, dep habarlaıdy QazAqparat tilshisi.
Úkimet otyrysynda tujyrymdamamen saýda jáne ıntegratsııa mınıstri Baqyt Sultanov tanystyrdy. Onyń aıtýynsha saýda Qazaqstannyń JІÓ-niń 17 paıyzyn quraıdy. 2019 jyldyń qorytyndysy boıynsha salanyń ósý qarqyny 7,6 paıyzdy quraǵan. Al jumyspen qamtylǵan qyzmetkerlerdiń sany 1,4 mln adamǵa jetken. Qazaqstannyń syrtqy saýda aınalymy 96,1 mlrd dollar bolyp otyr.
«Ázirlenip jatqan memlekettik baǵdarlamanyń maqsaty – naryqty sapaly ónimmen molyqtyrýdy jáne eksporttyq taýarlar men qyzmetterdiń básekege qabilettiligin qamtamasyz etetin zamanaýı saýda júıesin qurý jáne damytý», - dedi ol.
Óz kezeginde Úkimet basshysy bul baǵdarlamaǵa qatysty tıisti tapsyrma berdi.
«Qujatta qolaıly tutyný ortasyn qurýǵa, halyqty sapaly jáne qaýipsiz taýarlarmen qamtamasyz etýge, sondaı-aq qazaqstandyq taýarlar men qyzmetterdiń syrtqy naryqtarda básekege qabilettiligin arttyrýǵa baǵyttalǵan baǵdar ornatylýy tıis. Sondaı-aq halyqaralyq yntymaqtastyq aıasynda ulttyq múddelerdi qorǵaý jáne ilgeriletý ázirlenip jatqan baǵdarlamanyń basty maqsattarynyń biri bolýy kerek», - dedi Asqar Mamın.
