Úkimet saǵatynda depýtattar aldynda Asqar Jumaǵalıev esep beredi
ASTANA. 25 mamyr. QazAqparat - 28 mamyr, dúısenbi kúni Májiliste bolatyn Úkimet saǵaty «Info-kommýnıkatsııalyq tehnologııalar salasyn damytý nátıjeleri» taqyrybyna arnalady.
Bul jóninde Májilistiń baspasóz qyzmetinen habarlady.
Atalǵan taqyryp boıynsha depýtattar aldynda QR Kólik jáne kommýnıkatsııa mınıstri Asqar Jumaǵalıev baıandama jasaıdy. Mınıstr Elbasynyń bıylǵy halyqqa arnaǵan Joldaýyn iske asyrý úshin aǵymdaǵy jyly atqarylatyn jumystar jóninde túsinik bermek. Qazaqstan Respýblıkasynyń 2020 jylǵa deıingi strategııalyq josparyn iske asyrý maqsatynda mınıstrlik aldynda turǵan negizgi mindetterge toqtalady dep kútilýde.
Úkimet saǵatynda baıandamashy osy másele tóńireginde depýtattardyń suraqtaryna jaýap beredi.
