Úkimet ruqsat berý qujattaryn taǵy da 30 paıyzǵa qysqartpaq
ASTANA. 15 mamyr. QazAqparat - Úkimet ruqsat berý qujattaryn taǵy da 30 paıyzǵa qysqartpaq. Bul týraly búgin selektorlyq rejimdegi Úkimet otyrysynda «Ruqsat qujattardy azaıtý jáne memlekettik organdardyń baqylaý-qadaǵalaý qyzmetterin ońtaılandyrý máselelerine qatysty Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» zań jobasyna qatysty baıandama jasaǵan Ekonomıkalyq damý jáne saýda mınıstri Baqytjan Saǵyntaev aıtty.
«Zań jobasymen anyqtalǵan 1096 ruqsat qujatynyń joǵary qaýip-qaterden qaýipsizdendirýdi qamtamasyz etýge áser etpeıtin 257-si alynyp tastalyp, azamattardyń ómiri men densaýlyǵyna tikeleı qaýip tóndrimeıtin 40 habarlandyrý tártibine almastyrylady. Jalpy, ruqsat berý qujattarynyń shamamen 30 paıyzy qysqarady»,-dedi ol.
Mınıstrdiń atap ótýinshe, qysqartýǵa jatatyn ruqsat berý qujattarynyń basym bóligi kólik jáne kommýnıkatsııa, densaýlyq saqtaý, qorshaǵan ortany qorǵaý mınıstrlikteri men qurylys isi jáne turǵyn úı kommýnaldyq sharýashylyq agenttigine tıesili.
Jalpy, zań jobasy bıznes qoǵamdastyqtardyń qatysýymen «Nur Otan» partııasy ári múddeli memlekettik organdarmen birlesip ázirlengen. Ony ázirleý barysynda zańnamalarǵa aýdıt júrgizilip, bıznes júrgizýge kedergi keltiretin ákimshilik kedergilerdi joıý boıynsha kásipkerlerdiń usynystary jınastyrylǵan. Óz kezeginde Úkimet basshysy Kárim Másimov qujatty Mınıstrler kabınetiniń kelesi otyrysyna deıin taǵy bir pysyqtap, sodan keıin qabyldaýdy jáne Parlament qaraýyna jiberýdi usyndy.
