Úkimet rezervinen Mańǵystaý oblysyn sýmen qamtamasyz etý úshin qarajat bólinedi

ASTANA. QazAqparat - QR Úkimeti Mańǵystaý oblysynyń turǵyndaryn tuşy sýmen qamtamasyz etý máselesin sheshý úshin sharalar qabyldaýda, dep habarlaıdy QazAqparat.

Úkimet rezervinen Aqtaý qalasyndaǵy «Kaspıı» sý tuşytý zaýytyn keńeıtý» jobasyn aıaqtaýǵa 5,08 mlrd teńge qarajat bólindi. QR Premer-Mınıstri Á. Smaıylov tıisti qaýlyǵa qol qoıdy.

«Kaspıı» sý tuşytý zaýytyn keńeıtý máselesi – Memleket basshysynyń erekshe baqylaýynda. Joba 2021 jylǵy 22 qyrkúıekte QR Prezıdentiniń qatysýymen ótken «Mańǵystaý oblysynyń áleýmettik-ekonomıkalyq damýy týraly» keńestiń hattamasyn oryndaý aıasynda iske asyrylyp jatyr.

Esepke sáıkes jobany aıaqtaý zaýytqa aýyz sý óndirý kólemin táýligine 40 myń m3 deıin ulǵaıtýǵa múmkindik beredi. Kásiporynnyń burynǵy ónimdiligi budan eki ese az bolǵan.

Osy jyldyń 5 shildesinde Mańǵystaý oblysyna jumys sapary barysynda Premer-Mınıstr Á. Smaıylov jobanyń iske asyrylý barysymen tanysty. Úkimet basshysy Mańǵystaý oblysynyń Munaıly, Túpqaraǵan jáne Qaraqııa aýdandarynyń 180 myń turǵyny úshin zaýytty iske qosýdyń mańyzy zor ekenin atap ótti.

Oblys ákimdiginiń aqparaty boıynsha búginde qurylys-montajdaý jumystary 80%-ǵa oryndaldy.