Úkimet Reseımen shekarada elektr aǵyndarynyń aýytqýyn báseńdetetin modeldi iske qospaqshy
ASTANA. QazAqparat – Úkimet Reseımen shekarada elektr aǵyndarynyń aýytqýyn báseńdetetin modeldi iske qospaqshy. Bul týraly QR Premer-Mınıstri Álıhan Smaıylov Senat depýtattarynyń saýalyna joldaǵan jaýabynda málim etti, dep habarlaıdy QazAqparat tilshisi.
«Búginde elektr energııasy naryǵynda energııamen jabdyqtaýshy uıymdardyń eki túri jumys isteıdi – retteleıtin jáne rettelmeıtin. Retteletin jabdyqtaýshy uıymdardyń halyqqa (jeke tulǵalarǵa) arnalǵan tarıfiniń qymbattaýyna jol bermeý úshin elektr qýatynyń baǵasy ortasha baǵadan tómen deńgeıde belgilenedi. Al osydan týyndaǵan aıyrmashylyq tutynýshylardyń sanatyna (jeke tulǵalar, zańdy tulǵalar jáne bıýdjettik uıymdar) qaraı saralanǵan tarıf belgileý arqyly óteledi. Básekelestik qorǵaý jáne damytý agenttigi osy máseleni retteý úshin saralanǵan tarıfti kezeń-kezeńmen qoldanystan shyǵarý jumystaryn júrgizip keledi», - dep jazady Álıhan Smaıylov.
Úkimet basshysy elektrmen jabdyqtaýdyń jańa modeli qolǵa alynǵan eske salady.
«Onyń ústine Úkimet Parlamentke «Jylý jáne elektr energetıkasy máseleleri jónindegi QR zańnamalyq aktilerine birqatar ózgertýler men túeztýler engizý týraly» Zań jobasyn engizdi. Bul qujat elektr energetıkasy salasyn reformalap, naryqty ortalyqtandyrylǵan satyp alý-satý modeline kóshirýge baǵyttalǵan. Model elektr energııasyn satýda jáne satyp alýda alypsatarlyqtyń joly kesip, tıimsiz deldaldardy joıady. Sondaı-aq, Reseımen shekarada elektr aǵyndarynyń aýytqýyn báseńdetedi», - delingen jaýapta.
