Úkimet Reseı tóńiregindegi ahýaldyń Qazaqstan ekonomıkasyna teris yqpalynyń aldyn alý jónindegi jumys tobyn qurdy
ASTANA. QazAqparat - Úkimet Reseı tóńiregindegi ahýaldyń Qazaqstan ekonomıkasyna teris yqpalynyń aldyn alý jónindegi jumys tobyn qurdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka vıtse-mınıstri Mádına Ábilqasymova málim etti.
«QR Premer-Mınıstriniń tapsyrmasyna sáıkes ekonomıkalyq blok mınıstrlikteri men Ulttyq bank birlesip, Reseı tóńiregindegi, tolyqtaı alǵanda álemdegi ahýaldyń qarjy, bank sektorlaryndaǵy, jalpy makroekonomıkalyq saıasattyń turaqtylyǵyn qamtamasyz etýdegi Qazaqstan ekonomıkasyna teris yqpaldarynyń aldyn alý jónindegi jumys tobyn qurdy», - dedi ol.
Onyń atap ótýinshe, dollarsyzdaný aıasyndaǵy sharalardyń biri retinde halyqtyń ulttyq valıýtaǵa senimin arttyrý, sondaı-aq teńgemen kepildendirilgen depozıt kólemin kóterý múmkinshiligi qarastyrylýda.
