Úkimet polıetılen óndirisin damytý úshin strategııalyq seriktes izdep jatyr
«Jylyna 1,250 mln tonna polıetılen óndiretin zaýyt jobasyna áleýetti strategııalyq áriptes izdep jatyrmyz. Ol úshin ınvestordyń lıtsenzııalyq tehnologııasy men ótkizý naryǵy (off-take kelisimshart) jáne qarjylandyrýdy uıymdastyrý múmkindigi bolýy kerek. Sonyń negizinde kompanııalar toby quryldy. Búginde Sabic, Chevron jáne taǵy basqa kompanııalarmen kelissóz bastaldy», - dep jazdy Roman Sklıar depýtattyq saýalǵa bergen jaýabynda.
Ol, sondaı-aq «Teńizshevroıl» JShS-men birlesip, jylyna qurǵaq gazdan 9,7 mlrd tekshe metr etan alatyn óndiristiń ınfraqurylymyn salý máselesi pysyqtalyp jatqanyn atap ótti.
«Memlekettik-jekeshelik áriptestik boıynsha jobalyq-smetalyq qujattamany ázirleý jumystary bastaldy. Ony aǵymdaǵy jyldyń sońyna deıin aıaqtaý josparlanyp otyr. Tutastaı alǵanda, osy joba boıynsha 2021-2022 jyldary strategııalyq áriptesti aıqyndaý jáne ony iske asyrýǵa kirisý mindeti tur. Tsıklogeksan shyǵarý jobasy boıynsha jeke ınvestor AMÓZ-den benzoldy tsıklogeksanǵa (qýaty jylyna 150 myń tonna) qaıta óńdeý jónindegi jobany iske asyrýdy kózdedi. Alaıda, pandemııaǵa baılanysty ınvestor bul jobany qaraýdy toqtatty», - dedi vıtse-premer.
Onyń aıtýynsha, búgingi tańda kelesi bir jeke ınvestor jobanyń birqatar tusyn ózgertip, benzoldy qaıta óńdeý máselesin zerttep jatyr.
