Úkimet pen ákimder daǵdarys kezindegi menedjerler retinde ózin kórsete almady – Prezıdent
NUR-SULTAN. QazAqparat - Prezıdent Qasym-Jomart Toqaev ákimder men mınıstrler múldem basqa jaǵdaıda jumys isteýge daǵdylanyp qalǵanyn synǵa aldy, dep habarlaıdy QazAqparat tilshisi.
«Qalaı desek te ákimder men mınıstrler múldem basqa jaǵdaıda jumys isteýge daǵdylanyp qalǵan. Munaı baǵasy 100 dollar bolǵan kezde, ádemi baǵdarlamalar jasaldy, mınıstrlikter men ákimdikter bolsyn - bıýdjetteri jaqsy boldy. Kóptegen túrli ımıdjdik sharalar uıymdastyryldy», - dedi Qasym-Jomart Toqaev koronavırýs ınfektsııasynyń taralýyna qarsy kúres máseleleri boıynsha selektorlyq otyrysynda.
Prezıdent ákimder men mınıstrler tusaýkeserlerde, túrli forýmdarda Qazaqstannyń jetistikteri týraly áńgimelerdi aıtýdy qatty unatatynyn da eske saldy.
«Ómir súrý tásiliniń ózi bylaı boldy: jylyna eki demalys - bireýi qysta, ekinshisi – jazda. Osynyń bári memlekettik apparatty birshama bosańsytyp, tótenshe jaǵdaıda, daǵdarys jaǵdaıynda jumys isteýge qaýqarsyz qylyp tastaǵan. Barlyq oryndaýshylar - meıli ol Úkimet bolsyn, ákimder bolsyn daǵdarys kezindegi menedjerler retinde ózin kórsete almady», - dedi ol.
